FA Cup - Saints leh Leeds ten fifth round an lut

English football-a inelna ngaihhlut hlawh FA Cup fourth round replay match hmasa lam chu Thawhlehni zan khan khelh a ni a, club langsar Southampton leh Leeds United ten an khingpui ve ve hnehin fifth round an lut.

Thawhlehni zanah hian inkhel pathum awmin, season thara Premier League-a kir leh tum Saints chuan 3-0 ngawtin Watford an sawp a, Sekou Mara chuan goal hnih khungin Che Adams chuan assist vawi hnih a neih bakah goal khat a khung ve bawk.

Saints ang thoa Premier League kir tum Leeds United pawhin FA Cup lamah pawh tha an thlah lo a, Plymouth Argyle chu 4-1 a hnehin last 16 an lut chiang hle. Wilfried Gnonto, Crysencio Summerville, Georginio Rutter leh Ryan Hardie ten Leeds tan goal khat ṭheuh an khung.

Hetihlai hian Coventry City chuan an mikhual Sheffield Wednesday chu 4-1 in an sawp ve bawk a, Coventry tana Kasey Palmer-a goal hmahruai khung chu Bailey-Tye Cadamarteri hmangin Sheffield hian chhanglet zui mah se, Callum O'Hare goal hnih leh Haji Wright goal hmangin Coventry hian khung lehin, an chak chiang hle. Round of 16-ah non-league club Maidstone United an hmachhawn ang.

Match 24

Saints-in inelna hrang hrangah match 24 zet chu a zawnin tlawm an nei tawh lo a, an club record a ni - hemiin a ken tel chu FA Cup-a round of 16 luh leh Championship table-a pahnihna nih a ni a, Watford lakah pawh zahngaihna an lantir lo.

Southampton hian an match hmasa zawkah 1-1 in Watford hi an inhnehtawkpui a, replay match-ah pawh first half chhung goal an khung lo. Mahse, chawlhlawk hman a nih hnuah an zia tak tak an pholang a, goal thum ngawt an khung.

Minute 52-naah Mara inlarin, goal hmahruai a khung a, he goal luh theih nana Saints player-te che vel chu hmuhnawm tak a ni. Kum 21 mi Mara hian a duhtawk mai lo - minute ruk hnu lawkah mawi zetin an goal hnihna a khung leh a, 2-0 a ni der.

French striker Mara goal khung hi Adams-a siamsak ve ve a ni a, minute 76-naah Adams hian a khung ve leh ta thung. Hun tawp thlengin goal dang a lut lo a, Saints an chak chiang hle.

Hmabak Anfield!

Saints-in hnehna an chang a, an hmabak erawh Liverpool an ni - a awlsam dawn lo tih a chiang a, February 28 zanah Jurgen Klopp-a enkawl team nen hian FA Cup quarterfinal luh inchuhin an inkhel ang.

Southampton manager Russell Martin chuan, "Anfield-a kan zin hmain match khelh tur tam tak kan la nei a, tunah chuan Liverpool kan la ngaihtuah hman rih lo. Second half-ah result duhawm tak kan hlawh chhuak a, ka lawm hle a ni," a ti.

Season hmasaa Premier League aṭanga relegate Saints hi Championship table-ah pahnihna an ni mek a, match 29 khelh tawhah point 61 an nei mek - hmahruaitu Leicester City erawh point 11 laiin an thlau mek a, match khatin an khel tlem thung.

Scottish manager Martin chuan, "Kan hmaa chona inchhawp hautak ber chu Anfield zin a, kan nihna ang taka khelhchhuah a ni. Engmah thlak danglam kan tum lo a, kan tan chuan chona phurawm a ni," a ti zui.

Lung tileng Leeds

Premier League-a 19-na ni chungin season hmasaah Leeds an relegate a, mahse, he team langsar ve tak ṭhin hian top flight league-a kir tumin theihtawp an chhuah mek - chumi phenah chuan FA Cup lamah an che ṭha bawk a, an boruak a fuh hle.

Mahse, Championship club vantlang Plymouth paltlang turin Leeds hian extra time khelh an mamawh. Gnonto chuan minute 66-naah goal hmahruai khung mah se, Brendon Galloway hmangin Plymouth-in si phurh an sut a, minute 90 chhung goal dang a luh loh avangin extra time khelh a ni.

Extra time-ah erawh Summerville, Rutter leh Hardie hmangin Leeds-in an khung belh a, chiang takin hnehna an chang - Leeds hian nizana Chelsea leh Aston Villa inkhela chak zawk chu round of 16-ah an hmachhawn ang.

Norwich City boss hlui Daniel Farke-a enkawl Leeds hian Championship lamah pawh pathumna dinhmun an luah mek a, pahnihna Saints chu match khata khel tam chungin point khat chiahin an phak lo - Championship-ah hian a sang pahnih chin chu playoff khelh ngai loa season thara Premier League khel tura tling tur an ni.