Arsenal UCL squad-ah Timber a tel

UEFA Champions League last 16 khel tur Arsenal chuan an squad-ah Jurrien Timber an ziak lut - February thla chawhnu lam hian Portuguese club Porto nen an inhmachhawn ang.

Netherlands international hian nipui lai khan Ajax aṭangin pound maktaduai 38-in Arsenal hi a zawm. North London club tan player pawimawh tura ngaih ni mah se, Premier League match hmasa bera Nottingham Forest an hmachhawn ṭumin a inhliam a, a la inlan zui leh rih lo a ni.

A hliam avang khan UCL group stage bikah kha chuan squad-ah telh a ni lo, rin loh takin Lino Sousa telh a ni thung - mahse Timber hliam a dam chhoh mek bakah Sousa hi a nghetin Aston Villa lamah a kal tawh.

Timber hi inkhel turin la inpeih chiah lo mah se an thleng sang a nih chuan chhawr hman an inbeisei. Ani bakah hian hliam vanga chawl mek Thomas Partey, Gabriel Jesus leh Fabio Vieira te hming pawh ziah luh an ni bawk.

UEFA dan ang chuan, team pakhatin player 25 zel an ziak lut thei a, heng zinga pahnih tal chu goalkeeper an ni ngei tur a ni. Player pariat chu tualchhung palyer anga chhiar theih chin an ni tur a ni, hei hi 'locally trained players' tih a ni.

Tualchhung player anga chhiar theih hi chi hniha thliar hran an ni, anmahni club aṭanga inzirchhuakte bakah an awmna ram league-ah kum 21 an tlin hmaa season thum awm tling tawh chin an nih a ngai, hemi an nei tling lo a nih chuan player ziah luh theih zat an nei tlem mai ṭhin.

Arsenal Squad:

Goalkeeper: Aaron Ramsdale, David Raya, James Hillson.

Defender: William Saliba, Ben White, Gabriel Magalhaes, Jurrien Timber, Jakub Kiwior, Cedric Soares, Takehiro Tomiyasu, Oleksandr Zinchenko.

Midfielder: Thomas Partey, Martin Odegaard, Leandro Trossard, Jorginho, Fabio Vieira, Mohamed Elneny, Declan Rice.

Forward: Bukayo Saka, Gabriel Jesus, Emile Smith Rowe, Gabriel Martinelli, Eddie Nketiah, Reiss Nelson, Kai Havertz.