Saudi Arabia-ah Nadal leh Djokovic

Mipa tennis player langsar tak takin Saudi Arabia ramah exhibition match an khel dawn a, he hunah hian Rafael Nadal, Novak Djokovic, Carlos Alcaraz leh Australian Open 2024 champion Jannik Sinner te an tel dawn.

October thlaa an buatsaih tur hi “6 Kings Slam” tiin a hming an phuah a, hard court-a inkhel thiam Daniil Medvedev leh Holger Rune te pawh an tel - an zingah hian Rune chauh hi Grand Slam la champion lo a ni thung.

Thla hmasa khan Nadal chu Saudi Arabian Tennis Federation ambassador atan ruat a ni a, tun dinhmunah inkhel thei rih lo mah se favang hun a herchhuah meuh chuan inkhel hman turah a inngai a ni.

Grand Slam vawi 22 champion Nadal chuan, "Player dangte ang bawkin ka phur a, a vawi khat nan Riyadh-a kan inkhel tur hi ka nghakhlel hle bawk," tiin a sawi a, inlan theih ngei a tum.