Tyson Fury vs Oleksandr Usyk : Inhnek hun sawn chungchangah Usyk a ṭawng chhuak

Oleksandr Usyk chu Tyson Fury nena an inhnek hun tur sawn chungchangah a ṭawng chhuak a, "Tyson, ka unaupa, hlauthawng suh, nangmah mai chuan ka awmtir lo ang che," a ti a, British boxer chu awlsam taka kaltir mai a tum loh thu a sawi.

Boxer pahnih hi February 17-a inhnek tura tih an ni a, mahse, Fury hian training-naah hliam a neih avangin an inhnek hun tur hi May 18-ah sawn a ni - boxer pahnih inhnek tur hi vawi thum ngawt sawn a ni tawh tihna a ni.

Ruahmanna hmasa berah chuan April 2023 khan Wembley Stadium-a intawng tura tih an ni tawh a, mahse, inbiakna a tlawlh avangin an inhmachhawn ta lo. December 2023-ah inhnek tura tih ni leh mah se, Fury-a'n UFC star Francis Ngannou nena an inhnekah a beisei anga awlsama hnehna a chan loh avangin Usyk nena an inhnek tur hi an sawn leh a ṭul phah.

Tunah a vawi thum nan an inhnek hun tur sawn a ni leh ta a, a vawi thumna hi sawn a ngai leh a nih chuan Usyk hian Anthony Joshua emaw IBF belt a kawl laia dan anga amah hmachhawn thei tur Filip Hrgovic a hmachhawn a ṭul ang.

Belt pali

Boxer pahnih hian boxing khawvela belt langsar pali chu an kawl vek. Fury hi WBC heavyweight champion a nih laiin, Usyk hian WBA, WBO leh IBF heavyweight belt a kawl thung a, an inhnek a nih chuan kawnghren pali hi boxer pahnih hian an inchuh vek dawn.

Riyadh, Saudi Arabia-a inhnek tura chak zawk hi four-belt era-a undisputed heavyweight champion hmasa ber an ni dawn a, an inhnekna tur hmunah sum a tam tel bawk avangin boxer pahnih sum hnekchhuah tur ringawt pawh hi a tam dawn.

Hei vang tak hian khawvelin a nghakhlel a, mahse, Fury hliam vangin sawn a ngai leh ta. Usyk-a manager Alex Krassyuk chuan, "May 18 hmain a inhnek ngei a ngai a, a nih loh chuan IBF kawnghren a kawl lai chu laksak a ni dawn a ni," a ti a, inhnek hun chu sawn theih a nih tawh loh tur thu a sawi.

A tawi zawnga sawi chuan Fury hian a vawi li nan an inhnek hun tur hi a sawn leh a nih chuan boxer pahnih hi an intawn a rinawm lo a, rei tak heavyweight boxing a reh hnua thawm nei na pahnih hi an inhmachhawn lo ang tih chu boxing ngainatu tan chuan hlauhawm tak a ni.

Hawna chance

Usyk hian Fury nena an inhmachhawn tura inbuatsaih nan Spain-ah camp a nei a, January 28 khan a nupuiin an fa pahnihna hrinsak mah se a nupui kiangah pawh awm thei loin a inbuatsaih - mahse, an inhnek hun sawn a ni leh ta si!

Mahse, kum 37 mi Usyk chuan Fury dem duh loin, "Ka hlim loh phah lo. Hei hi hringnun chu a ni a, mihring nunahte chuan thil tam tak a thleng ve ṭhin bawk alawm. Tunah chuan Ukraine-a hawna chance ka nei a ni mai a, ka hlim takzet a ni.

"Ka nupui leh ka fanute pahnih ka hmu ang a, kan Biak inah inkhawmin ka ṭawngṭai ang a, chawlh hahdamna hun tawite neiin, ka training camp-ah ka kir leh ang," a ti a, a êng zawngin thil a thlir thiam hle.

Usyk hian Thawhlehni khan Valencia-ah press mi sawm bikte tan inkawmna hun a siam a, Spain, United Kingdom leh Ukraine aṭanga sawm bik media-te an kal - Fury hmachhawn tura a inbuatsaihna pholan nana tih a ni a, mahse, Fury a inhliam leh tak siah chuan an inhnek sawn chungchang an sawi ta zawk.

Lawm lohna

Usyk-a team-te hi Fury-a'n inhnek a sawn leh avang hian an lawm tawh lo a, Usyk-a manager pakhat Egis Klimas chuan, "Tyson Fury hi mi dawihzep tak, Usyk a hmachhawn lohna tur a nih chuan eng pawh tihhreh nei lo a ni. A training pui kha a inhnek nat luih tir a ni ang chu," tiin a lo sawi tawh.

Fury chuan hei hi chhanglet zuiin, "Egis, engtikahmah mi lawi lo ang maiin min ko tawh suh ang che. Ka nunah hi tu fa mah hlauin ka la tlanchhe ngai lo," a ti zui a, boruak a nung hle.

Mahse, Usyk ber hi a insum thei a, Ukrainian boxer hian a mit koa hliam nei Fury chu dam thuai tura a duhsak thu a lo sawi tawh. Usyk chuan, "Fury-a inhliam tih ka hriat kha chuan kei chu ka nui mai a, 'A pawi loh chu, ka training ka zo ang a, ṭul dang kan tih chhunzawm ang e' ka ti mai a ni," a ti.

Kum 1999 khan Lennox Lewis chuan Evander Holyfield hnehin, undisputed heavyweight champion a lo ni tawh a, hemi hnua a vawi khat nan Fury leh Usyk inhneka chak zawk chuan heavyweight kawnghren lian tham zawng zawng an kawl dawn. Usyk chuan, "Tyson a ni emaw, a ni lo emaw ka ngaihtuah lo a, kawnghren zawng zawng kawl hi ka duh chu a ni mai," a ti a, heavyweight champion ropui nih a tum.