Leverkusen-in semifinal an lut

DFB Pokal-ah Bayer Leverkusen chuan VfB Stuttgart 3-2 in an hneh a, semifinal an lut. German Cup-ah hian Leverkusen bakah Dusseldorf leh FC Kaiserslautern ten semifinal an lut tawh a, nizan khan Saarbrucken leh Borussia Monchengladbach ten quarterfinal hnuhnung ber an khel.

BayArena-ah Lever-kusen-in Stuttgart an mikhual a, Alonso hote hi tun season-a hneh loh la tawng lo an ni. German Cup quarterfinal-ah Leverkusen hian bul an ṭan chhe zawk a, minute 11 lekah Stutggart tan Waldemar Anton-a'n corner kick aṭanga ball kal chu a tauh lut.

Leverkusen tlarhnung a phui tawk lo a, Stuttgart hian chance ṭha dang pawh an nei a, an hmang ṭangkai lo. Leverkusen-in an nawr zui a, Patrik Schick-a goal khung chu offside vangin pawm a ni lo.

Second half-ah Leverkusen-in bul an ṭan ṭha a, minute 50-naah Robert Andrich-a'n box pawn aṭangin mawi zetin a hlai lut. Mualneitu mipui lawm hman viau mah se minute riat hnuah Chris Fuhrich hmangin Stutggart-in hma an hruai nawn. Leverkusen hian tlarhnung aṭanga ball pass chhuah an tum a, an tihsual vang ni bawk mah se Fuhrich-a finishing a ṭha takzet.

Leverkusen chesual mah se an khelh dan ngai thoin an khel a, tlarhnungah ball an la inpe kual tho. Alonso hote hian tlarhnunga ball an inpek hnuah an nawr thut a, Florian Wirtz-a ball pek tawih zet chu minute 66-naah Amine Adli-a'n si phurh sut nan a hmang.

Mualneitu lam an phur zel a, minute 90-naah an mamawh chakna goal an khung. Corner kick aṭanga ball chhuak chu Wirtz-a'n vawrhlut lehin Jonathan Tah-a'n ṭha zetin a tauh lut. Leverkusen 3-2 in an chak a, Alonso pawh chak lawmin a zuang sang hle.

Semifinal inkhel tur hi February 11, Pathianni zanah pawh a ni dawn a, Xabi Alonso hoten nomawi an beisei zel. Chutihrualin Alonso hote hian DFB Pokal aiin Bundesliga nomawi an duh zawk a; February 11, Inrinni zan hian an mualah champion lai Bayern Munich nen an inkhel ang.