Club neitu lamin Poch an thlawp

Chelsea manager Mauricio Pochettino chuan club thuneitu lam aṭangin thu lawmawm a dawn thu a sawi, a hna aṭangin an ban rih mai dawn lo niin a lang - dinhmun chiang tak erawh a la ni hran lo.

London club hian season an hmang ṭha tawk lo. Premier League-ah Liverpool leh Wolves lakah a zawnin an tlawm a ni satliah lo, heng inkhel pahnihah hian goal li ngawt an chhuah ve ve a ni.

Nizan khan Blues leh Aston Villa ten FA Cup an khel a, an result a zirin manager Poch dinhmun pawh hi a la danglam mai thei. Villa nen an inkhelh hma erawh chuan thuneitu lamin an thlawp.

Argentine manager Pochetino chuan, "Ka hmuh dan chuan tun hun harsa laiah hian nghet takin kan ding ho a ni. Ni tin mai hian club neitu leh Sporting Director nen kan inbia, an hnen aṭangin thu lawmawm lam zel ka dawng," a ti.

Chelsea tan Premier League champion nih beisei ngam chi a ni tawh lo a, a sang zual palina Aston Villa an phak lohna pawh point 15 lai a ni tawh, an tan Champions League khelh theih pawh beisei a harsa tawh ang.

American sumdawng hausa Todd Boehly-a'n thuneihna a chan hnuah player lei nan sum an hmang nasa a, amah-erawhchu an duh leh beisei angin an khel thei lo thung - an insiamṭha thuai a nih loh chuan Poch hian thlawpna ṭha a dawn reng theih a rinawm loh a ni.