Match hmasa berah Osaka chak lo

Hmeichhe tennis world number 1 hlui Naomi Osaka chuan fa a neih hnuah match khel leh mah se beisei angin result ṭha a nei thei rih lo. Abu Dhabi Open a match hmasa berah a tlawm leh nghal.

Fa a neih avangin inkhelh a chawlhsan lailawk a, tun season tir aṭangin a lo kir leh. A hmasa ber atan Brisbane International-ah inlanin vawi khat a chak, a hnuah Australian Open leh Abu Dhabi Open khel lehin hneh a nei lo.

Thawhlehni zan inkhelah Japanese nula hian world number 7 hlui Danielle Collins chu 7-5, 6-0 in a ngam lo. A chak loh hnuah Osaka chuan, "A nihna tak sawi chuan ka lo kir lehna hi hlawhchhamna a ni berah ka ngai tawh.

"Ka ṭawngkawm leh thumal hi a mawi lo deuh a ni mai thei, chutihrualin ka khelh dan thlir chuan hetiang hi a ni tlat si," a ti. Thla 15 ngawt a chawl a, a inkhelh loh chhungin thil a lo danglam vak pawh a ni hran lo, mahse Osaka hian tun hma lama a khelh dan kha a phak ta lo a ni.