Afcon 2023 hmarbawk a hnai ta: Final khel tur Ivory Coast leh Nigeria

Ivory Coast leh Nigeria te chu 2023 Africa Cup of Nations final khel turin an tling. Africa rama football thiam ber ram zawnna hi February 10, Pathianni zanlaiah neih a ni dawn, boruak a sang khawp ang.

Nilaini zan khan semifinal pahnih khelh niin, inelna thlengtu Ivory Coast chuan Sebastien Haller-a goal khat hmangin DR Congo 1-0 in an hneh. Inkhel dangah Nigeria chuan South Africa chu penalty shootout-ah 4-2 a hnehin final an lut ve bawk.

Haller-a goal

A thlengtu an ni bawk a, Ivory Coast lamin thlawptu an nei ṭha - Alassane Ouattara Stadium chhunga inkhel entute chuan serthlum rawng (Orange) an ha vek emawni tih mai tur a ni, a sir kil khatah DR Congo ṭantute an ṭhu khawm ve bawk, mahse tam tham an ni lo.

Beisei loh tak maiin DR Congo lamin ball chang tam hmasain an hlauhawm thei hle - Ivory Coast tlarhnung an rum ṭhaih fo a, mahse an chesual duh mai bik lo, goal lut loin chawlhlawk an hmang.

Second half minute 65-naah Haller a inlar. Borussia Dortmund striker Haller-a'n ball kang lai chu leiah a hlap sawt (ting) a, ball per kang hi keeper Lionel Mpasi-a'n lo zuan phak loin a goal daih, a pet ṭhat bakah keeper awmna a fuh tawk loh vangah a ngaih theih.

DR Congo lamin bei let viau mah se si phurh an sut thei lo. Meschack Elia chuan a hun ṭha goal zawnah a pet thei lo a, hun tawp dawn hnai tak takah Simon Banza pawhin remchang nei mah se a chhawr ṭangkai thei ta bik chuang lo.

Ivory Coast hian group stage an hman ṭhat tawk loh avangin coach Jean-Louis Gasset an ban a, inkhel dangah Senegal leh Mali te goal khung avangin knockout stage an lut hram, tunah chuan coach lailawk Emerse Fae hoin final an thleng der tawh.

Nigeria an tlang

Teboho Mokoena-a penalty chhuih luh chu Nigeria lamin an chak tlangpui teuh hle, mahse hun tawp dawnah South Africa lamin Grant Kekana-a penalty hmang bawkin an sut a, extra time khelh zawh hnuah pawh goal dang a lut chhunzawm tawh lo.

Penalty shootout hmangin chak zawk an zawng - Nigeria tan Terem Moffi, Kenneth Omeruo, William Troost-Ekong leh Kelechi Iheanacho ten an khung laiin Ola Aina chauhin a hlah. South Africa tan Mihlali Mayambela leh Mothobi Mvala te chauhin an khung thung.

Nigeria hian Afcon an group match hmasa berah goal an chhuah a, a hnu lamah chuan semifinal-ah chiah hian an chhuah leh a ni. Goal khung tam ṭhin lo mah se an tlarhnung phui an ṭhatpui - South Africa lakah pawh ball possession 39% chauh nei chungin an inveng thei.

Afcon 2023 khelh a nih dawn khan Victor Osimhen chu sawi hlawh leh mipui hmuh châk a ni a, mahse African Footballer of the Year Osimhen hian final an thlen thleng hian goal khat bak a la khung lo, player ṭangkai zinga mi ni mah se amah an beisei dan nen a inmil rih lo.

Nigeria striker Victor Osimhen chuan, "Nigeria tana nomawi hlawhchhuah hi ka naupan lai aṭanga ka duhthusam kha a ni a, tunah chuan remchang ṭha a hnai ve ta hle, hlenchhuah ngei tumin theihtawp kan chhuah ang," tiin an ram champion pui a tum hle.