Silly Point : RANJI TROPHY
BCCI huang chhunga kan luh hnuah thlasik ṭum ruk zet kan hmachhawn hnuah, Mizoram Cricket chuan bung thar kaina hun remchang a lo inhaikaw ta.
Assam rama thingtlang khaw lian lem lo, Mangaldai khua-a Cricket Stadium-ah Ranji Trophy Plate Group semifinal khelh a ni dawn. Mizoramin league stage lama an hneh tawh loh, Meghalaya an hmachhawn ang. Semifinal hi vawiin chhiar telin ni nga khelh tur a ni a, Meghalaya laka Mizoram khawsak dan hian engkim a hril tawh dawn a ni.
A tirah chuan
Kum 2018 aṭanga Lodha Reform vanga khatia, ram tenau leh ruh no zawk te, 1st class cricket kan han khelh ve tak thut khan, Plate division team 7-8 rual ho kha hmun khata dah khawmin, league match inkhelkual hnuah a tawp sang ber kha Elite division ah an lut ta mai ṭhin.
Elite Division a luh pawh kha a harsa reng a, khang hunlai Plate Group-ah pawh lo chungnung deuh Chandigarh, Uttarakhand, Bihar etc vel tan lo kha chuan luh ve en a en chi pawh a ni lem lo.
Reform
BCCI lam chuan Ranji Trophy Tournament kalphung an her danglam hret hret a, chutah Plate Group chu team 6 chiah awm tawhin, league match an intum kual hnua,a chungnung 4 ten Semi Final khel lehin, hetah Final lut 2 te hi a kumlehah team dang 32 lo awmsa te zinga tal ve turin Elite division ah promotion an hmu ta a, tin Elite Division a team 34 inelna a point hmu tlem ber 2 te hi a kum lehah religate ni in, Plate Group ah an rawn khawsak ve a ngai ta thin a. Nikum lama rawn tlathla Hyderabad erawh, Plate Group ah na na na chuan kumin chu an vawklallen khawp mai. Kan Thenawm State Silchar vai ho Assam hi mawng sawh dawmin an rawn tlalthlak hmel viau a, Assam ho chunga nakum lama Elite Division a kaichhoh hi khawvela thil chakawm ber zinga mi a ni ta hial awm e.
Team Mizoram
Professional pathum kan lak zinga Bollywood film siamtu Oscar Nominee pawh lo ni tawh Vinod Chopra fapa Agni Chopra 'form' a ṭha hle. A kutah hian batting department nasa takin a innghat leh dawn. Hei tak hi Meghalaya pawn an rawn bitum chat tur a ni ang.
Agni-a an vawm hlum hma chuan, rul lu an tansakah an inngai dawn. Chutiang a lo thleng palh a nih pawhin ram leilung fa Joseph-a te, Hruaizela te, Jehu-a, Vikash-a te etc te chungah a innghah theih ang. Kumina an chetla han thlir hian, keini khelh ve ṭhin lai ai ngawt chuan ngaih a ngam zawk chiang.
Bowling department-ah hun rei tak hotute kan lo ṭah awh ṭhin pace bowler India Under 19 star hlui Mohit Jangra lo awm veleh chiah a, mystery spinner an tih ṭhin KC Carriappa a awm tel bawk.
All rounder Carriappa hi a talent anga inpho chhuak zo lo zawk mah a tih theh a, IPL lamah pawh cheng vaibelchhe hnih chuanga Kolkata Knight Riders ten an lo lei tawh a ni.
Karnataka chhul chhuak Carriappa leh Jangra te inkawp hi tumpuite thla titliaktu an nih zel beisei ta ila. An thlazar hnuaiah senior bowler Biakvela te, Bobby te, Dika Ralte leh captain HM Ralte ten an hna an thawk leh turah ngai theih. Multi day-ah hi chuan bowler-te an pawimawh lehzual a, Mizoram hi bowling department kutah thui tak a innghat.
Magaldai lamah aw
Assam kan hria, Guwahati leh Silchar hre lo Mizo chhul chhuak kan awm meuh lo ang. Magaldai khua erawh hre lo hi a tam zawk kan ni ngei ang. Tun ni nga chhung erawh, he Assam rama khaw te takte Magaldai khuaa kan Mizo tlangvalte khawsak dan hian, cricket history-a bung thar kan kai leh kai loh inkar thui tak a hril dawn avangin, cricket tui mite chu kan Magaldai sek mai dawn a nih hi maw!
Meghalaya hi Mizoram aiin cricket-ah chuan sulhnu nei lian zawk fe an ni a. Mizoram hian hneh pawh kan hneh hleih theih loh an ni. Tun Season league match lamah hnehsawh takin Mizoram hian Meghalaya hi an lo sawp tawh.
Plate group semifinal-a chak hi Elite-ah an chho dawn. Hei vang hian Mizoram tan Meghalaya hneh nawn hi a pawimawh takzet. Mizoram hi an chak a nih chuan Meghalaya chungah ringawt ni loin Assam chungah an awm thei bawk dawn.
Tun hma aṭangin cricket bikah chuan Assam chu sawi loh Silchar ringawt pawh hi Mizoramin an elpha lo a, Silchar vai ho hi Mizoram chunga lengah an inngai. Amaherawhchu anni hi Elite group aṭangin Plate group-a tla tura ngaih an ni.
Chutihrualin a hmawr bawkna turah hian Mizoram hi, a khual chang zawk an nih dawn avangin an irhfiah thut thuk thei bawk. Ka ṭhianpa leh Meghalaya cricket legend, keimah ang bawka chawl hahdam ve ta, JJ Lamare nen pawh mahni awm hmunah kan lo inhrosak khum dun nasa mai.
All the Best - Team Mizoram