Mizoram team-ah Police player

Mizoram aiawha 77th National Football Championship for the Santosh Trophy 2023-24 Final Rounds khel tur zingah Mizoram Police player paruk an tel dawn.

All India Police Meet awm avangin Mizoram team-ah MPL10 champion Police player-te tel lo tura ngaih ni mah se AIFF ngenna anga Police Meet inkhelh hun sawn a nih hnuah Mizoram Police hotuten Mizoram tan Police player-te an chhuah.

Santosh Trophy khel tura Mizoram team-a kohte hi qualifying round-a khel player panga goalkeeper F. Lalmuanawma, defender Lalhmunmawia leh Lalrinzuala, midfielder H. Lalbiakthanga leh R. Malsawmtluanga te bakah Mizo striker ṭha ber zinga mi Malsawmfela te an ni.

Mizoram Football Association chuan, "Mizoram Police player-te hi Mizoram team tan an thawh hlawk ṭhin hle a. Phal taka an player te Mizoram team tana feh chhuah phalsaktu Mizoram Police hotute chungah kan lawm takzet," tiin thuchhuah an siam.

Santosh Trophy qualifying round-ah khan Police player pangate hian Mizoram team-ah hmun pawimawh an chang a, defender Ahmuntea (MPL best defender) leh MPL10 best player BT-a ten minute zawng zawng an khel kim vek. MPL10 best goalkeeper Muanawma pawh match khat chiah a awl a, defender Rinzuala hi tun ṭum squad-a Santosh Trophy champion tawh awmchhun a ni a, midfielder MS-a tawnhriat leh thiamna a hlu viau bawk.

Amritsar-a qualifying round khelh khan Sawmfela hi koh ni mah se ṭhathangthar zawkte kianin a kal lo a, tun ṭumah erawh coaching staff-te ngenna ngai pawimawhin a kal dawn. Qualfiying round-a top scorer Khawpuimawia'n club a hmu a, striker theihna nei sang Suanngaihmuana chu khup hliam vangin koh theih a ni lo. January 31, Nilaini - transfer tawp niah Aizawl FC-in Mizoram team-a mi C. Lalhriatpuia an la a, Mizoram team harsatna hriain Sawmfela hi a rawn pen chhuak a ni.

Santosh Trophy final round khel tur hian player 22 thlan tur a ni a; February 14, Nilaini thleng team list hi a thehluh theih. Mizoram team hi coach Lalsangzuala Hmar leh manager K. Lalenghluna ten an enkawl a ni.

Final round-ah Mizoram hi Karnataka, Maharashtra, Delhi, Manipur, Mizoram leh Railways te nen awm ho a, group khat aṭangin a sang paliin quarterfinal an lut ang. Santosh Trophy hi National Games khel tur zawnna a nih bawk avangin a pawimawh hle.