Qatar lawmna thlentu Ali 'Goal'

Asian Cup 2023-ah inelna thlengtu leh champion lai Qatar-in final an thleng a, an hneh chu Asia powerhouse Iran a ni. Al Thumama Stadium, Doha-ah Qatar-in minute 82-naa Almoez Ali goal hmangin Iran 3-2 in an hneh.

February 7, Nilaini zan inkhelah Iran-in Sardar Azmoun-a goal hmangin hma hruai nghal mah se Jassem Gaber Abdulsallam leh Akram Afif te goal hmangin Qatar-in an lehthal. Iran-in Alireza Jahanbakhsh penalty hmangin second half-ah si phurh sut mah se Ali-a'n hun tawp dawnah chakna goal a khung.

Inkhel boruak a ṭang a, Iran defender Shojae Khalilzadeh chu injury time-ah hnawhchhuah a ni. Player 10-a khel chungin Iran goal nawr na mah se Qatar an ṭang tlang. Final hi February 10, Inrinni zanah Jordan leh Qatar ten an khel ang.

Boruak a 'hot' sa

Kum 2015 khan Iran hian Qatar hi 1-0 a hnehin Asian Cup aṭangin an pet tla tawh a, tun ṭumah erawh Qatar hian an ramah Iran hnenh ngei an tum. AFC danah chuan Qatar hian Iran ṭantute tan 8% tal dah tur a nih laiin Qatar hian 4% chauh an dahsak.

AFC bulah Iranian federation an zualko a, Al Thumama Stadium-ah erawh Qatar ṭantuten Iran ṭantute an tam hneh tawh tho tho. Entu 40,342 zingah Iran ṭantu tlem azawng chauh an awm tiin a sawi theih.

Goal a tam

Football tihmuhnawmtu chu goal a ni a, Iran leh Qatar inkhel tihmuhnawmtu pawh goal a ni. Iran-in minute lina lekah Sardar Azmoun hmangin goal an khung a, kum 29 mi Azmoun-a overhead kick a mawi takzet.

Qatar an bet reng lo. Minute 17-naah Jassem Gaber Abdulsallam-a'n box pawn aṭangin a pet goal a, a vannei tel - Iran defender dan per zarah goal-ah a lut. Mipui thawm a ṭha a, mulneitu lam an khel ṭha chhunzawm bawk.

Darkar chanve hnuah Iran pass sual nangchingtu Akram Afif-a'n ṭha zetin a la lut a, mah se keeper Alireza Beiranvand-a'n a dansak. Belgium midfielder Marouane Fellaini ang deuha sam buk deuh chhup, Afif hi Qatar tan player pawimawh a ni a, goal khatna pawh a siamsak a ni.

Minute 43-naah Afif hun a thleng a, mual vei lam aṭangin box chhungah ball la lutin mawi zetin a hlai lut. Half time-ah Qatar-in 2-1 in hma an hruai a, inkhel a nung ṭha hle.

A hmuhnawm zel

Second half-ah Iran-in goal chance an nei hmasa a, VAR an ṭangkaipui bawk. Midfielder Saeed Ezatolahi ball pet chuan Qatar midfielder Ahmed Fatehi kut a per a, VAR hmanga ennawn a nih hnuah penalty a ni.

Tawnhriat nei ṭha Alireza Jahanbakhsh a rawn pen chhuak a, Iran si phurh sutna goal a khung. Iran hi team ṭha zawka ngaih ni mah se Qatar lamin an ngam ve tho a, goal chance pawh an nei ṭha. Qatar winger Yousuf Abdurisag ball pet ṭha zet pawh keeper Beiranvand-a'n a dang.

Minute 82-naah Qatar-in an goal bawh nat rah an seng a, an vannei tel bawk. Vei lam aṭanga Afif-a cross chu Iran defender-in a tauh chhuak a, substitute Abdulaziz Hatem chuan chang fuhin goal-ah a pet. Hatem-a shot hi ṭha tawk lo mah se Almoez Ali zawnah chiah a tla a, 2019 AFC Asian Cup golden boot dawngtu hian a hun ṭha neih hi a hlah lo - chakna goal a ni zui bawk.

Mahse, Qatar hi awlsam takin an chak lo. Afif titlutu Iranian defender Khalilzadeh hnawhchhuah a ni chungin Iran goal bawh a na hle. Injury time-ah minute 13 zet pek belh a ni a, captain Jahanbakhsh ball pet chuan goal ban chhung lam a per hnuah goal pawnah chiah a chhuak.

Hun tawp hma hretin Iran substitute Reza Asadi ball pet chu ṭha tawk lo mah se Qatar defender a per hnuah goal-ah a kal a, keeper Meshaal Barsham-a'n a dang hram. Minute 16 chuang hret injury time khelh a ni a, Qatar 3-2 in an chak.

Beisei loh final

Semifinal aṭanga thlir chuan Asian Cup final-ah South Korea leh Iran te inkhel se, final duhthusam a tih theih ang. Mahse, nomawi inchuh tur chu Qatar leh Jordan an ni.

Iran hian Europe ram lian pawh hneh thei Japan hnehin semifinal an lut a, amaherawhchu Qatar lakah an thamral. Inelna thlengtu Qatar erawh final an lut ringawt lo a, an ram mipui puihna nen champion rinkai an ni.

Chutihrualin South Korea hnehtu Jordan hi dah hniam an thiang lo a, an vawi khat final luhna ni mah se nomawi chawi thei turin theihna an nei tih an pholang. Football ang zawnga ram langsar ni lo Jordan-in final an lut hi India football tan fuihtu ṭha a ni thei ang.