Copa del Rey semifinal - Atletico an tlawm!
Atletico Madrid tan tun season-ah Copa del Rey tluka champion a hnaihna a awm lo. Mahse, Diego Simeone-a naute hun pawimawhah an chesual a, Copa del Rey semifinal first leg-ah Athletic Bilbao chu 1-0 in an ngam lo!
Atletico-in anmahni mualah ngei team nem zawka ngaih Bilbao an ngam lo a, result duhawm lo a ni. Bilbao hian minute 25-naah Alex Berenguer-a penalty hmangin goal hmahruai an khung a, Atletico-in hun tawp thlenga a chhanletna tur nei loin an tlawm.
February 29, zing lam dar 2-ah Copa del Rey semifinal second leg hi khelh leh tur a ni a, Bilbao khelmualah si phur sa chunga an lenluh dawn avangin mahni muala chak zo lo Atletico tan a harsa tawh dawn.
Beisei bo
Metropolitano Stadium-a inkhelah Atletico-in mualneitu zia an chhuah a, inkhel bul an ṭan ṭha hle. Mahse, a pawimawh ber goal an khung thei lo a, Rodrigo de Paul, Memphis Depay leh Antoine Griezmann ten an chance neih an chhawr lo vek.
Bilbao-in inthlahrun an tum bik lo. Midfielder Benat Prados lakah Atletico defender Reinildo Mandava a chesual a, penalty a chawi - Berenguer chuan harsatna nei loin goal-ah a chantir zui a, mahni mualah Atletico an hawihai.
Atletico coach Diego Simeone chuan, "Kan tihsualah penalty hmangin min hrem nghal a ni," a ti a, an khingpuiten an chance neih chhun an khawhral ve lo chu team pahnih danglamna a nih thu a sawi.
Tlarhma bil
Atletico-in si phurh sutna remchang nei mah se an chhawr thei lo a, second half-ah Bilbao-in goal venhim an ngaih pawimawh zui avangin a harsa tawh - Spanish football-a tlarhma inkawp 'hot' ber ang hiala chhal theih ni mek Griezmann leh Alvaro Morata te meuh pawhin goal an khung thei lo.
Simeone chuan, "Tlarhmaah kan hriam fo ṭhin a, mahse, tun ṭum chu chutiang a ni thei tlat lo. Tlarhnung erawh kan veng ṭha a, kan khel ṭha thawkhat viau thoin ka hria," a ti a, an tlarhma bil chu Bilbao laka an chak loh chhanah a ngai.
Yeray Alvarez-a'n Alvaro Morata laka a foul avangin penalty a chawi zet a, Atletico an phur hman. Mahse, video assistant referee (VAR) hmanga ennawn a nih hnuah pawm a ni lo a, Atletico an tlawm.
A tawpna
Atletico hian an mualah match 28 zet chu tlawm nei loin hun an lo hmang tawh a, team nem zawka ngaih Bilbao-in rin loh takin an tihtawpsak - kum 2013 hnua a vawi khat nana Copa del Rey final khelh an tumna chu tihderthawnin a awm mek.
Bilbao tana goal khungtu Berenguer chuan, "Atletico hi an ṭha tih kan hria a, he hmuna hnehna chang tura khelh chu a harsa takzet. Mahse, result duhawm tak kan hlawh chhuak a, kan mualah a hmawr kan bawk ṭhat ngei ka beisei," a ti.
Thawhlehni zan khan Copa del Rey semifinal inkhel dangah Real Mallorca leh Real Sociedad chu 0-0 in an lo inhnehtawk tawh bawk a, Real Madrid leh Barcelona an awm tawh loh avangin Atletico tan Copa del Rey hi champion theihna chance a sang - second leg-ah result ṭha zawk hlawhchhuah ngei an tum ang.