Nipuiah Toney a chhuah ka ring - Frank

Brentford boss Thomas Frank chuan an striker chhuanvawr Ivan Toney chu nipuiah a chhuah a rin thu a sawi a, kum 27 mi striker hi Premier League club langsar Arsenal leh Chelsea nen sawizawm an ni mek.

Kum 27 mki Toney hi pawisa inchawina lama a lo inhman avangin thla riat zet chu inkhel thei loa hrem a ni a, hremna a tawrh zawh hnua a match hmasa berah goal khung nghalin, a lo kir hnua league match thum a khelhah goal hnih a khung leh der tawh.

Tun season a hman zawh meuh chuan Brentford-ah hian kum khat bak contract a nei tawh dawn lo a, Premier League club tenau tan a contract tawp thleng kawl ai chuan man man zawka a chhuah theih laia hralh chu thutlukna fing a ni ang.

Frank chuan, "Tun nipuiah Toney hi kan chhuahtir ang tih chu thil chiang tluk deuhthaw a ni a, player neih ṭhat ber chu kan tuar ang tih ka hria a, chutihrual chuan kum khat chiah contract a nei tawh tih pawh ka hre tel ve tho.

"A hlutna pawh kan hria a, ka ngaihdanah chuan, tun dinhmunah chuan ani aia striker ṭha hi khawvelah an tam lo a ni," a ti a, English striker hi an chhuahtir a nih pawhin man tlawm tak chuan an chhuahtir dawn lo niin a lang.

Nikum May thla khan Toney hi hrem ṭan a ni a, a tirah thla 11 atan hrem ni mah se, a thil tihsual a pawm avangin thla riatah tihtawi a ni a, January 20 khan a lo kirna inkhelah Nottingham Forest chu hmachhawnin, 3-2 in an chak a, goal a khung nghal.

January khan Toney hian Premier League club lian tana khelh a châk thu a lo sawi tawh a, mahse, thlasik transfer-ah erawh dawrtu a nei lo niin coach Thomas Frank chuan a sawi.

Frank chuan, "Tun thlasik bazar-ah chuan dawrtu kan nei lem lo a, mahse, amah duhtu club an tam lo a nih chuan a mak ngawt ang. Striker thiam tak, a kum lah hi a vanglai hun hmang mek a ni. Mimal tak chuan Toney hi chelh reng theih ka duh a, mahse, top team tana a khel hmuh hi ka châk ve tho a ni," a ti a, career ropui zawk nei turin a striker chu chhuah ngai dawn mah se a hrethiam.

Toney hian League One club Peterborough United tan match 94-a goal 49 a khung hnuah, August 2020 khan pound maktaduai 5, a khelh ṭhat dan a zira £10mtd thlenga sang chho thei turin hetihlaia Championship club Brentford a zawm a, a season hmasa berah match 52 khela goal 33 khung nghalin, Premier League a kaipui bawk.

English top flight league-a a season hmasa berah match 33 khelin goal 12 a khung nghal a, inelna hrang hrangah match 37 khelin goal 14 a khung. Season hmasa khan match 35-ah goal 21 a khung a, tun season-ah league match thum khelin goal hnih a khung tawh.