Zaninah table hmahruaitu nih inchuh

Indian Super League hmahruaitu Odisha FC chuan zanin dar 7:30 hian FC Goa an mikhual dawn a, Odisha hian an tlawm loh chuan league table chung ber an luah chhunzawm zel ang.

Odisha hian Mizo player pakua kawl chungin season an ṭan a, mahse, thlasik transfer-ah Isaac Vanmalsawma a chhuah avangin player pariat chiah an kawl tawh a, an kawl zingah Jerry Mawihmingthanga, Jerry Lalrinzuala, K. Lalṭhathanga (Puitea) leh Isak Vanlalruatfela ten hmun pawimawh an chang ṭhin.

Zaninah pawh player pali hian hmun pawimawh an chang tura ngaih a ni - Odisha hian league match 14 an khelh tawhah vawi kua hnehna changin, vawi hnih chiah an la tlawm a, vawi thum draw an nei.

FC Goa hi table-ah pahnihna niin, match thumin Odisha ai hian an khel tlem thung a, point thumin Odisha hi an phak lo mek - Goan club hian Ayush Chhetri chu Mizoram player an kawl a ni.

Nilaini zan khan ISL inkhel pakhat awmin, Bengaluru chuan an mikhual Chennaiyin FC chu 1-0 in an hneh a, Australian winger Ryan Williams chuan inkhela goal awmchhun hi a khung.

Bengaluru tan midfielder Lalremtluanga Fanai chu hun tawp dawnah luhtir a ni a, kum 19 mi midfielder hmabak nei êng tak hian tun season hi ISL a hmachhawn vawi khatna niin, India rama club inelna sang berah hian minute 96 chhung khelmualah hun a hmang ve tawh.