Isco hma hun a chiang lo

La Liga-a season duhawm tak hmangtu Isco hma hun a chiang lo a, Real Madrid attacking midfielder hlui hi Euro 2024 khel lo thei dinhmunah a ding mek - a khelh mekna Betis leh Spain tan chanchin lawmawm lo a ni.

Betis hian kar hmasa league inkhelah Getafe chu 1-1 in an inhnehtawkpui a, Isco hian penalty aṭangin goal a khung nghe nghe. Mahse, hliam vangin lakchhuah a ngai a, a tirah thla khat vel chawl tur anga sawi ni mah se Spanish media ṭhenkhat chuan kar ruk aṭanga kar riat tal a chawlh tur thu an tarlang.

Real Betis hian Isco malpui hliam hi zai kher loa enkawl dam dan an ngaihtuah nia sawi a ni a, zai a nih chuan season tawp thleng chhawr theih a ni dawn lo. Zai lo pawh ni se, thla thar international break-a Spain-in Colombia leh Brazil an hmachhawn hunah a inlan thei lo ang.

Euro hmaa international break hnuhnung berah a awm lo a nih chuan Isco tan Euro 2024 squad-a hmun chan a harsa dawn a, a dinhmun hi a khirh hle. Kum 31 mi attacking midfielder hian Spain tan match 38 khel tawhin goal 12 a khung a, mahse, kum 2019 hnuah ram tan a inlan leh tawh lo.

Tun season-ah Betis-ah intuai tharin, inelna hrang hrangah match 29 khelin goal sarih a khung tawh a, assist vawi nga a nei bawk - a match hnuhnung paliah goal li a khung a, a chet ṭhat vanglai takin a inhliam.

Isco khelhna Betis hian zanin dar 1:30-ah league match khel turin Cadiz an lenchilh dawn a, table-ah pariatna dinhmun luah mekin, season thara European football khelh an la tum ruh ve rih hle.