Zaninah Aizawl FC Vs Mohammedan

Zanin dar 7:00 hian RG Stadium, Mualpuiah I League inkhelah pawh en châkawm bik chhawpchhuah a ni dawn a, Aizawl FC-in coach thar Stojkoski Bobi hnuaia an match hmasa berah league hmahruaitu Mohammedan SC an mikhual dawn.

Aizawl FC coach thar Bob-a hnathawh hmuhin a awm dawn a, an player thar Polish midfielder Rafal Zaborowski leh striker thar Lalhriatpuia te fiahna hun a ni ang.

Inbuatsaihna ṭha

Mizoram Premier League khelh zawh a ni tawh a, I League atan chauh Aizawl FC an insawrbing tawh. Training hmun ṭha tak RG Stadium an nei a, kumin atana round hmasa berah an tel loh avangin club dang aiin kar khat chhungin inbuatsaihna an nei tam.

North Macedonia aṭanga Aizawl FC enkawl tura Mizorama rawn pantu Bob hi kum 57 mi a ni tawh a, coach khawng ṭha tak a nih rualin biang biak nuam tak a ni.

Bob-a awm hnua langsar tak chu foreign player an thawkrim a, a bik takin Brazilian defender Gustavo Silva a thawkrim zual. Training zawhah hun rei tak amahin training a nei leh ṭhin.

Chutihrualin tlarhnunga rinrawl tur erawh Serbian defender Ivan Maric a la ni dawn a, Gustavo hian a thawhrim rah hmuin bul a ṭan a rinawm. Mizo player-te an fitness a ṭha a, inelna hmachhawn turin an inpeih tawh.

Chutihrualin top scorer ni mek Lalrinzuala erawh hliam a la damchian loh avangin a khelh a rinawm lo a, defender Lalmuanawma (Munez) pawhin hliam tenau a neih avangin a awl rih bawk ang. Rinzuala awm loh hlawkpui tur chu Hriata a ni a, MPL10-a Electric Veng FC captain hi a inlan a nih chuan I League-a a vawi khat inlanna tur a ni.

Mizo tamna

Mohammedan hi Mizo tamna an ni a, AFC hmachhawn turin player paruk Zodingliana Ralte, Samuel Lalmuanpuia, Lalremsanga Fanai, David Lalhlansanga, Vanlalzuidika Chhakchhuak leh Lalbiakhlua Jongte te an rawn zin vek.

Kolkata club hian kuminah bul an ṭan ṭha lo a, an mualah Real Kashmir 3-0 in an hneh lo. Aizawl FC lakah insiamṭhat an tum dawn a, I League champion-in Indian Super League an khelh avangin Mohammedan tan chetsual a thiang tawh lo.

Mohammedan hian goalkeeper Biaka an chhawr tam tawk lo a, Mizo dang zawng erawh bul ṭan thei vek an ni. Adinga, Samuel, Remsanga leh David-a te hi Aizawl FC tana khel tawh vek an ni a, an club hlui an hmachhawn dawn. Defender Zuidika pawh hi Aizawl FC hrechiangtu a ni a, Chhinga Veng leh Electric Veng FC tan MPL-ah ṭha takin a khel tawh a ni.