Pathianni zan dar 10-ah Villa Vs Man United

Manchester United-in an phur lai takin an chunga awm Aston Villa an tlawh dawn. February 11, Pathianni zan dar 10:00 hian Unai Emery hoten Villa Park-ah Erik Ten Hag-a hote an mikhual ang.

British sumdawng hausa Jim Ratcliffe-a'n Man United-ah thuneihna a nei dawn tih a chian hnuah khelmual chhunga an result pawh a ṭha a, match zawnin vawi thum an chak tawh. Ten Hag-a hote hi match hnuhnung berah phei chuan West Ham United 3-0 in an hneh a, goal an chhuah lo.

Man United lawmna belchhah turin Rasmus Hojlund-a'n goal a khung ṭan a, league match hnuhnung paliah goal li a khung a, rawlthar duhawm dang Alejandro Garnacho leh Kobbie Mainoo te an hmuhnawm thei hle. Man United hian an mualah Villa hi 3-2 in an hneh tawh a, Emery hote hian kar laihawl khan Chelsea chu 3-1 ngawtin an mualah an hneh lo.

Chutihrualin Villa hi dah hniam a thiang lo a, Man United aiin khelh zat inangah point riatin an hmu sang mek. English striker Ollie Watkins-a'n tun season league-ah goal 11 a khung tawh a, Lisandro Martinez tel lohna United tlarhnung tan buaina tham a tling ang.

United leh Villa inkhel tur hi season thara UCL khel tur zawnna tiin a sawi theih a, Emery hote tan Champions League khel turin Ten Hag-a hote hneh hi a pawimawh takzet.