Zanin dar 8:30-ah Asian Cup final

Asian Cup 2023 inelna thlengtu leh champion lai Qatar chuan zanin dar 8:30 hian Jordan nen Lusail Stadium-ah final an khel dawn. Qatar hi semifinal-a Iran hnehtu an ni a, Jordan hian a vawi khat nana final thleng turin South Korea an hneh.

Qatar hi an muala khel tur an nih bakah Asian Cup-a sulhnu nei ṭha zawk an nih avangin champion tura rinkai zawk an ni. Akram Afif-a'n tun inelnaah goal nga a khung tawh a, Iraq tana goal ruk khungtu Aymen Hussein chauh tun inelnaa goal khung tam lamah a pha lo.

Kum 27 mi Afif hi tun inelnaah a hmuhnawm a, goal a khung loh ṭum pawhin mual vei lam sirah a hlauhawm ṭhin hle. Captain Hassan Al-Haydos pawhin goal li a khung tawh a, inelna hnuhnung ber top scorer Almoez Ali-a'n goal hnih chauh a la khung thung.

Jordan hi rinkai lo zawk ni mah se South Korea laka an khelh dan en chuan zuam chi an ni lo. A bik takin Musa Al-Taamari chevel chu hmuhnawm a tling a, Ligue 1 club Montpellier tana khel winger hi final-ah pawh a hmuhnawm ang.

FIFA ranking-ah Jordan hi 87-na chauh a ni a, chutihrualin rinkai lo zawk an nih avangin pressure an nei tlem dawn. South Korea an hmachhawn ṭum anga Al-Taamari leh Yazan Al-Naimat te an inthlawp ṭhat chuan Qatar tan buaina tham a tling ngei ang.

Asian Cup-ah hian Japan an champion ngun ber tawh a, vawi li an champion tawh. Samurai Blue bakah hian Saudi Arabia (3), Iran (3), South Korea (2), Israel (1), Kuwait (1), Australia (1), Iraq (1) leh Qatar (1) te an champion tawh bawk.