Zanin dar 11-ah Bundesliga final : Bayer Leverkusen Vs Bayern Munich

February thla tir chauh la ni mah se Bundesliga-ah erawh tun season-a inkhel en châkawm bera chhal theih chu zanin dar 11:00 hian BayArena-a khelh a ni dawn. Bundesliga hmahruaitu Bayer Leverkusen-in German football roreltu Bayern Munich an mikhual dawn a, Premier League bakah Asian Cup leh Afcon final chhiar tel vekin tunkar tawp inkhel en châkawm ber ang hiala chhal theih a ni.

Xabi Alonso hi Real Madrid, Liverpool leh Bayern Munich midfielder hlui a ni a, a inkhelh hun laia football fan-te ngaihnat a nih ang chiahin coach a nih hnuah pawh an ngaina chhunzawm. Spanish manager Alonso hi Liverpool ṭantu ṭhahnem takin Jurgen Klopp a thlaktu atan an duh a, Thomas Tuchel-a hmaah eng ang chiaha ṭha nge a ni tih a hriat dawn.

A hnungah hruaitu

Bayern captain Manuel Neuer hi chu goalkeeper ropui ber zinga mi a ni a, captain hriat hlawhtak a ni bawk. Leverkusen captain pawh hi goalkeeper tho a ni a, Lukas Hradecky hi kum 34 mi niin Finland tan vawi 90 a inlan tawh a, Neuer ang thoa tawnhriat nei ṭha a ni.

Hradecky hi league-ah match khat chiah a la awl a, save vawi 58 zet nei tawhin Leverkusen-in Bundesliga-a goal venghim ṭha ber record an neihna kawngah a pawimawh. Kum 2018 German Cup final-ah khan Hradecky telna Eintracht Frankfurt chuan Olympiastadion, Berlin-ah Bayern hi 3-1 a hnehin nomawi an chawi a, tun ṭumah erawh Bundesliga nomawi chhuhsak an tum thung dawn.

Neuer erawhin vawi 11 zet Bundesliga nomawi a chawi tawh a, vawi 224 clean sheet a nei tawhin league record chelhtu a ni. Inhliam vangin hun rei tak chawl mah se kum 37 mi Germany international keeper hian a ke hmangin ball a la sem thei reng a, tlarhnung aṭanga team uaptu ṭha tak a la ni reng.

Bang rinawm

Asian Cup khela zin Kim Min-jae a lo kir leh tawh mah se Bayern innghahna tur erawh Matthijs de Ligt a ni ang. De Ligt hian match hnuhnung bera Borussia Monchengladbach an hneh ṭumin hun tawp dawnah a tauh lut a, tlarhnung chauh ni loin goal nawr kawngah a pawimawh.

Season liam ta khan De Ligt hian league nomawi an chawi theih nan vawi 31 zet a khel a; Florian Wirtz, Jonas Hofmann, Patrik Schick te ho hmachhawn turin a pawimawh dawn. Leverkusen lamin Jonathan Tah an nei thung a, German defender hian kar laihawla DFB Pokal-a VfB Stuttgart an hneh theih nan minute 90-naah chakna goal a tauh lut.

Kum 27 mi Tah hi tlarhnung aṭanga a ball pass chhuah a ṭha a, Germany-in Euro 2024 an thlen turah pawh inelna thlengtu tan defender pawimawh a ni thei ang. Tah hi defender a nichungin league-ah pawh goal li a khung tawh a, Leverkusen tan a pawimawh hle.

Team innghahna

Season liam taa Arsenal team khaikhawmtu Granit Xhaka kha Alonso-a'n mual chhung khaikawhmtuah a hmang a, Swiss midfielder hi a thawkrim ṭhin hle. Match 19 a khel tawhah 236 km vel zet a tlan tawh a, match tina 12.4 km tlan ang niin league-a tlan hnem ber dawttu a ni pha.

Alonso tan pawh Xhaka hi malsawmna a ni a, a tawnhriat hi team tan a hlu. Bayern lam hian mual laiah hotu an nei tawk lo a, Leon Goretzka leh Joshua Kimmich te inkawp hi tun hnaiah beisei an pha tawk lo. Kimmich hi inliam vangin match hnuhnung pahnihah a khel lo a, a aiah Aleksandar Pavlovic a lut ve ve.

Kimmich hian training a zawm leh tawh avangin kum naupang zawk Pavlovic-a'n Germany international tan hmun a ken mai rinawm.

Talent nei ṭha bik

Bayern-in kum 20 mi Jamal Musiala an kawl a, a kum la naupang mah se Germany tan Euro C'ship leh World Cup a khel der tawh. Musiala thiamzia sawi nawn a ngai tawh lo. Leverkusen-in Musiala ang thoa talent nei ṭha an kawl a, a hming chu Florian Wirtz a ni.

Leverkusen tana jersey no. 10 hatu Wirtz hian killer pass a pe thei a, goal nga bakah assist vawi riat a nei tawh. Germany coach Julian Nagelsmann pawhin Euro 2024-ah Musiala leh Wirtz te khelh kawp tir dan a zawng dawn a, zaninah erawh an inhmachhawn a ngai thung.

Goal lam hi

Goal a nih tawh chuan Harry Kane a hming a rawn lang nghal a, England captain hian Bundesliga-ah goal 23 khung tawhin Leverkusen defender ten an veng uluk khawp ang. Kane bakah hian Leroy Sane, Kingsley Coman, Thomas Muller, Mathys Tel te an awm a, Serge Gnabry la inhliam mah se tlarhma lam erawh buaipui tham vek an ni.

Leverkusen-in goal khung turin Victor Boniface an nei a, match 16 lek aṭangin goal 10 khung tawhin assist vawi sarih a nei tawh. Mahse, Boniface hian inhliam vangin Bayern a hmachhawn thei dawn lo a, a hmunnruak luah khat a har dawn.

Chutihrualin Boniface aia lut Patrik Schick-a'n nikum kum tawp khan hattrick a siam a, kuminah la khung lo mah se Leverkusen tana match 102 a khelh tawh aṭanga goal 47 khung tawh tih hriat a ṭha. Schick hi Wirtz bakah Alex Grimaldo leh Nathan Tella te hoin a thlawp dawn a, tlarhnung phui ṭha bik lo Bayern tan ven an harsa khawp ang.

Tuchel vs Alonso

A tawpah chuan manager pahnih inbeihna hi a pawimawh ta ber chu a ni a, Allianz Arena-a an intawn hmasak ṭumin 2-2 in an inhnehtawk. Alonso hote hian tun season-ah hneh loh an la tawng lo a, Spanish manager hian German Cup-ah semifinal lut tawhin nomawi chawi turin an dinhmun a ṭha hle.

Alonso-a'n tun season-ah hming a chher a, Liverpool nena sawizawm a ni hian a chet ṭhat zia a sawifiah. Chutihrualin Tuchel erawh ban theih dinhmunah a ding a, season liam taa Bundesliga nomawi chawi ṭawkin tun season-ah a talbuai leh mek. Chelsea leh PSG manager hlui hian Bayern hi a champion pui lo a ni chuan an ban dawn tih a chiang a, an chet ṭha tawk lo a nih chuan season tawp hmain an ban thei bawk.