India leh Bangladesh te 'joint champion'

SAFF U19 Women's Championship-ah Cindy Remruatpuii Colney telna India leh final-a an khingpui Bangladesh te chu joint champion-ah an puang. India leh Bangladesh te hi hun pangngaiah 1-1 in an inhnehtawk a, penalty shootout-ah vawi 11 ve ve petin an pet goal vek.

Ṭhumvawr hmangin chak zawn a ni a, India an vannei zawk. Thuneituten India hi chak zawkin puang hman mah se Bangladesh-in an lungawi lohna an lantir a, official-te ngenna angin India an inhnukhniam a, team pahnih hi joint champion-a puan an ni.

SAFF U19-ah hian team pali India, Bangaldesh, Bhutan leh Nepal te an inel a, vawi khat ṭheuh an inkhelh chhuah hnuah a sang pahnihin final hi an khel. Group stage-ah India hian Bangladesh hi 1-0 in hneh lo.

Final hi BSSS Mostafa Kamal Stadium, Dhaka-a khelh a ni a, mikhual team hian Sibani Devi hmangin hma an hruai. Bangladesh lamin injury time-ah Mosammat Sagorika hmangin an sut hram.

India coach Sukla Dutta-i'n mak takin final-ah substituion a siam lo a, Nepal laka goal khungtu Cindy pawh bench-ah a ṭhu tluan. Sukla Dutta hote hian injury time-ah goal chhuah mah se penalty shootout-ah an pet goal vek a, 11-11 in an inhnehtawk. Ṭhumvawrah India an vannei a, mah se Bangladesh an tlawm duh lo.

AIFF-a secretary general hna chelh lailawktu M Satyanarayan chuan, "Ṭhumvawrah chak mah ila official te ngenna kan ngai pawimawh. Fans ṭhenkhatin buaina an siam a, player leh official-te himna kan ngaih pawimawh a ṭul a ni," tiin an thutlukna siam dan a sawifiah.

Bangladesh hi champion lai an ni a, inelna thlengtu ni chunga nomawi an nawr chhuah chhiar telin vawi li an champion. India tan erawh tun hi an vawi hnihn champion-na chauh a ni.