Pathianni zanah Afcon 2023 final : A thlengtu Ivory Coast hmaah Nigeria

Africa ramte football hmanga inelna lian leh ngaihhlut ber 2023 CAF Africa Cup of Nations chu Pathianni zan dar 1:30 hian a hmawr bawk a ni dawn, inelna thlengtu Ivory Coast leh Nigeria te an inhmachhawn ang.

Ivory Coast hian semifinal-ah DR Congo 1-0 a hnehin final an inhlangkai a, an khingpui tur Nigeria hian penalty shootout-ah South Africa 4-2 hnehin an tlang ve bawk, harsa takin final an inhlangkai ve ve tihna a ni.

Ram pahnihte hi group stage-ah khan an lo intawng tawh - William Troost-Ekong-a penalty chhuih luh hmangin Nigeria hi si khat faiin an chak. Super Eagles hian hneh tawh sa laka chak nawn an tum dawn, a thlengtu lamin fans puihna nen hneh let an tum thung ang.

Afcon bikah chuan tawnhriat nei ṭha tawh pahnih an ni. Nigeria hi vawi thum an champion tawh, kum 1980, 1994 leh 2013 te khan nomawi an chawi. Ivory Coast hian kum 1992 leh 2015 khan hlawhtlinna an chang ve thung, tun ṭumah hian an chak chuan champion hnem lamah an nih rual dawn.

Ivory Coast midfielder Jean-Michael Seri chuan final an thlen dan kawng sawiin, "Taksa bakah rilru leh thlarau a tel. player zawng zawng kan inringtawn vek a, chu chuan rah ṭha a chhuah a ni. Boruak ṭha lo ni ila tun hi kan thleng phak lo ang.

"Rinna leh beiseina sang tak kan nei a, chumi tihhlawhtlin tum chuan thi leh thau pawlhin kan bei, match khat kan la hmabakah atan hian tha thlah kan tum lo," tiin a sawi.

Elephants (Ivory Coast sawina) hian group stage an khel ṭha lo, coach Jean-Louis Gasset an ban hial. Knockout stage aṭangin coach lailawk Emerse Fae kaihhruaina hnuaiah khelin final hial an thleng, inelna tir lama an boruak nen chuan a danglam tawh - a hmawr bawk ṭhat an la hmabak.

Nigeria hi a tirah khan champion tura rinkai leh buk rit an ni a, inelna an hmachhawn danah erawh harsa tak deuh zelin an tlang. Striker ṭha Victor Osimhen nei mah se last 16 china an hmawnraw hlauhawm ber chu Ademola Lookman a ni.

Cameroon leh Angola an hneh ṭuma goal khungtu Lookman hi Ivory Coast tlarhnungten an ven uluk tur a ni a, ani an ven karah hian Napoli striker Osimhen an thlah dul palh a nih chuan a pawi thui thei bawk.