Thiago a hliam leh tawh!

Liverpool midfielder Thiago Alcantara a inhliam leh tawh a, a chawlh chen tur tarlan a awm lo. Kum 32 midfielder hian April 2023 khan a khel bawrah hliam a tuar a, rei tak a chawlh hnuah Pathianni zana Liverpool leh Arsenal inkhelh ṭumin minute 85-naah luhtir a ni.

Mahse, khelmuala rei lotê hun a hman chhungin Thiago hi a inhliam leh hman a, Liverpool-in zanin dar 8:30-a Burnley an mikhual hunah a inlan thei dawn lo. Thiago hian kum 2020 khan Bayern Munich aṭangin Reds hi a zawm a, inelna hrang hrangah match 98 inlansak tawhin, hliam vangin a buai ngun hle.

Thiago bakah hian malpui hliam vangin Dominik Szoboszlai chuan Burnley a hmachhawn thei dawn lo bawk a, forward chhuanvawr Mohamed Salah chu a hliam enkawl mek a la ni bawk. Hetihlai hian Japan midfielder Wataru Endo chu Klopp tan chhawr theih a ni leh tawh a, Asian Cup quarterfinal aṭanga an tlak hnuah Endo hian Anfield a pan leh tawh.

Liverpool hi Premier League hmahruaitu ni mek mah se, Pathianni zan khan Arsenal chu 3-1 a an ngam loh avangin an hmahruaina a derthawng mek a, English top flight league a ngaihnawm chho hle.