La Liga hmahruaitu nih inchuh - Real vs Girona

Tun season La Liga-ah rin loh taka champion beisei zingah Girona an tel a, table-ah pahnih an ni mek - hmahruaitu Real Madrid an phak lohna chu point hnih chiah a ni a, match 23 lai khelh a nih tawh avangin tihpalh thil thua che ṭhat ngawt chu an ni bik lo.

Zanin dar 11:00 hian team pahnih hi an intawng dawn a, Santiago Bernabeu-a inkhel tur an nih bawk avangin boruak a sang dawn - Real tan hmahruaitu nih chhunzawm zel turin draw result a tawk a, Girona tan chak a ngai thung.

Real pawhin tun chauh thlir loin, a fal thei anga an elpuite tlansan zel an duh ang tih a chiang a, zaninah chak an tum dawn. A tawi zawnga sawi chuan zaninah chak tum pahnih, champion tum pahnih an intawng dawn a, a hmuhnawm loh ring suh.

Atletico Madrid chu Pathianni zan dar 11:00-ah an inlan dawn a, insiamṭhat tum Sevilla khelmualah an leng ang. Barcelona chu Pathianni zan dar 1:30-ah an inlan ve dawn bawk a, Granada an mikhual thung ang.

Girona belchiang ang

Tun season-a La Liga match 23 an khelh tawhah Girona-in vawi khat chiah tlawm an la nei a, vawi 17 chakin, vawi nga an draw a, an ngam loh awmchhun erawh Real Madrid niin, team pahnih intawn hmasakah 3-0 in Real an chak.

Tun dinhmuna Girona player langsar chu Artem Dovbyk a ni a, kum 26 mi striker hian tun season inelna hrang hrangah match 26 khela goal 15 khungin assist vawi riat a nei tawh a, zaninah Real tlarhnung tan ven bik a sual lo ang.

Cristhian Stuani hi kum 37 mi ni tawh mah se Girona tan player langsar a la ni reng a, tun season inelna hrang hrangah match 26 khela goal 12 khungin, assist vawi hnih a nei tawh - Savio hi kum 19 mi lek ni mah se, match 27-ah goal sarih leh assist vawi sarih a nei tawh bawk.

Defensive midfielder Aleix García hi tun dinhmun an thlen theih nana tha thawhhlawk a ni a, winger Valery Fernandez leh Portu te pawh tun season-a Girona tingaihnawmtu zingah an tel a, Girona hi Real tan awlsam taka hneh theih an ni dawn bik lo.

Real beiseina

Spanish Super Cup champion hlim Real hi Copa del Rey aṭangin Atletico Madrid-in pet chhuak tawh mah se Champions League round of 16 an lut tawh a, La Liga-a hma an hruai mek bawk - champion theihna dang pahnih an la nei a, thlauh an duh tawh dawn lo.

A bik takin La Liga-ah tuna an awmnaah hian season khar an duh ang tih a chiang a, chumi tur chuan zanina an elpui Girona hneh hi a pawimawh dawn - hneh tur khawp player an nei bawk a, zanin inkhel a hmuhnawm loh ring suh.

Tun season-a match 28 aṭanga goal 18 leh assist vawi riat neitu Jude Bellingham hi mipui mit fukna tur a ni leh dawn a, kum 33 mi Joselu pawh Real a zawm tirhah rin hlawh lo mah se, goal 12 leh assist vawi li nei tawh a nih avangin ngaihthah reng a thiang tawh lo.

Vinicius Junior-a'n match 20 a khelh aṭangin goal 11 leh assist vawi nga a nei tawh a, Rodrygo chuan match 33-ah goal 12 khungin assist vawi sarih a nei bawk. Brahim Diaz-a'n a vanglai tawng chho mekin, match 26-ah goal sarih leh assist vawi thum a nei bawk a, Girona tan Real lakah fimkhur thiam a ṭul khawp ang.