Roma leh e Rossi tan fiahna dik tak
Daniele De Rossi-a'n a club hmangaih AS Roma tan nasa takin danglamna a thlen mek a, a hnathawh hi eng ang taka ṭha nge a nih chu fiahin a awm dawn - zanin dar 10:30 hian Serie A match khel turin Inter Milan an lo mikhual ang.
Roma hian season an hman ṭhat loh avangin Jose Mourinho an ban a, a hmun ruakah player a nih laia Roma legend Rossi an la lut. Italian manager hian a club hi match thum a kaihruai tawh a, a chakpui vek a ni.
Mahse, match thum an chak hi ṭha tak angin lang mah se fiahna tak tia sawi theih a la ni lo, an hnehte chu table hnuai lama talbuai lai vek an ni. Tun ṭumah erawh champion tura rinkai ber leh hmahruai mektu Inter an ni dawn.
A zawna vawi thum an tlawm hnuah Rossi hoin a zawnin vawi thum an chak ve thung a, an boruak erawh a danglam tih a chiang. Stadio Olimpico-ah mipui an khat hneh dawn, player 12-na fans puihna nen Roma hian Inter lak aṭanga point hmuhchhuah ngei an tum ngam ang.
Portuguese manager Mourinho khan Roma hi Europa Conference League nomawi a chawipui a, season hmasa khan Europa League final lut mah se nomawi an chawi ta lo, a chhuah dawn meuh chuan an squad a ṭhat tawk loh thu a sawi.
Rossi erawhin an match hnuhnung bera an chak hnuin a naute an ṭhat tawk thu a sawi a, hna a thawh chinah squad tihchak nan player lakluh la nei chiah lo mah se a neih sate inrintawkna a siamsak a, a tiphur thiam tih a chiang.
Inter Milan hneh erawh thil awlsam a ni dawn lo - tun hnai season hnih chhung Simone Inzaghi-a enkawl Inter hian Stadio Olimpico-ah hnehna hlado an chham ve ve a, kum 2016 hnu lamah Roma hian an mikhual Inter lakah hnehna an la chang leh ngai lo.
De Rossi-a'n a hna a thawh ṭan tirh khan, European football inelna sang ber Champions League khelh phak tuma an beih tur thu a sawi a, tunah chuan an ban phakah a awm mek - palina Atalanta an phak lohna chu point khat chauh a ni a, an tan kawng a inhawng zau hle.
Pathumna dinhmun luah mektu AC Milan chuan Pathianni zanlaiah champion lai Napoli an mikhual dawn. Naples club tan champion beisei ngam ni tawh lo mah se UCL ticket tal neih an tum a nih chuan chetsual fo a rem tawh lo.