Hei aia ṭha zawk ka beisei - Bengaluru boss

Season hmang ṭha lo tak Bengaluru-in coach thar Gerard Zaragoza hnuaiah intuaithar hna an thawk mek a, an league match hnuhnung berah Chennaiyin chu 1-0 in an hneh.

Mahse, Nilaini zana an result-ah lawm mah se, Gerard Zaragoza chuan, "Kan result avangin ka lawm a, chutihrual chuan kha aia ṭha zawk kha ka la beisei cheu - a chhan chu goal hnih emaw goal thum dang khung thei kan ni tlat a ni," a ti.

Bengaluru hian beisei anga season bul an ṭan loh avangin an coach Simon Grayson chu December 8 khan an ban a, Gerard hi an la lut. Spanish coach hnuaiah hian league match li khel tawhin, vawi hnih an chak a, vawi khat draw leh vawi khat tlawm an nei.

Bangalore club hi Pathianni zan dar 7:30-ah an inlan zui dawn a, anmahni ang thoa insiamṭhat hna thawk mek Jamshedpur FC khelmualah an leng ang. JFC hi Aizawl FC boss hlui Khalid Jamil chuan a enkawl.

Men of Steel hian December 29 khan an coach Scott Cooper chu banin, Khalid hi December 31 khan an la lut. NorthEast United boss hlui hnuaiah hian Super Cup-ah semifinal an lut a, league match hnih aṭangin point li an hlawh chhuak tawh bawk.