Asian Cup-ah Qatar a zawnin an champion

Akram Afif-a'n Asian Cup 2023 final-ah penalty hattrick a siam a, inelna thlengtu Qatar-in Asian champion ni turin Jordan 3-1 in an hneh.

Qatar hi football ram lian tia hriat lar ni lo mah se FIFA World Cup 2022 thlengtu an ni a, Asian Cup-ah a zawnin an champion. The Maroons hi Asian football-ah dah hniam theih an ni tawh lo.

Qatar 'Fellaini'

Afro hairstyle hi football khawvelah chuan Marouane Fellaini-a'n a larpui a, tuna rawn larpui lehtu chu Akram Afif a ni. Kum 27 mi Qatar left winger hi Al Sadd tan a khel mek a, Europe-ah Villarreal leh Sporting Gijón-ah beisei angin hlawhtling lo mah se a theihna thup bo reng theih a ni lo.

Final-ah hian Afif hian vei lam aṭangin ball a la lut a, Jordan defender Abdallah Nasib-a'n box chhungah a titlu. Referee-in penalty a pe a, Afif hian keeper bum lo mah se keeper dinglam kilah lei hrulin minute 22-naah a pet lut.

Qatar-in goal dang khung an harsat a, Jordan-in na takin an nawr ve bawk. Final vawi khat thlenna Jordan hian second half ṭan ṭhain an phu angin minute 67-naah Yazan Al-Naimat hmangin si phurh an sut.

Mahse, 1-1 a nih hnuah Qatar ben harhin an awm a, an vannei tel bawk. Jordan winger Mahmoud Al-Mardi-a'n box chhungah substitute Ismail Mohamad a titlu. Afif a rawn pen chhuak a, minute 73-naah keeper dinglamah tho kawh zetin a pet lut.

Injury time-ah Afif-a'n Jordan offside trap bumin ball a la lut a, keeper Yazeed Abulaila lakah penalty a hlawh chhuak. Afif hian hattrick siam nan a pet goal a, keeper vei lamah pet tawh thungin Abulaila a bum chiang hle. Afif hian goal riat khungin top scorer a ni a, best player atana thlan a ni bawk.

Hmasawnna a zuang

Jordan-in nomawi chawi lo mah se a vawi khat nan semifinal an thleng a, Asian powerhouse South Korea hnehin final hial an lut. Final-ah pawh Jordan-in football hmuhnawm tak an la khel thei a, an tlarhma nung ṭha tak chu ennawm a tling.

Semifinal-a player hmuhnawm Musa Al-Taamari chu final-ah pawh a la hmuhnawm reng a, Jordan hi second half ṭantirhah an hmuhnawm zual. Jordan captain Ihsan Haddad-a'n right back aṭangin overlapping a rawn la ṭhin a, goal hmaa a rik pawp theih avangin Qatar tlarhnung a tibuai hle.

Box chhungah Ali Olwan-a'n rang takin a kheng a, goal zawn ni se goal mawi bika sawi a ni ang. Si phurh an sut nan Al-Naimat-a'n box chhungah mawi zetin ball a la thla a, chiang takin a pet goal. Premier League-ah pawh khatianga goal ṭha kha hmuh tur a awm zen zen lo. Jordan football-in hma a sawn a, Asian football hmasawnna a zuang a tih theih bawk.

A tawpah hlimna

Lusail Stadium, Lusail-ah entu 86,492 zet an pungkhawm a, Qatar ṭantute hi Jordan mipuiin an ngawihtir theih tak loh avangin stadium chhung boruak a ṭha hle. Qatar hi Australia-in kum 2015-a an rama Asian Cup nomawi an chawi hnua inelna thlengtu ni chunga champion leh thei hmasa ber an ni.

Japan-in kum 2004-a champion nomawi an humhim hnua inelna zawna champion leh thei hmasa ber an ni a, Qatar record hi a ropui hle. Asian Cup-a vawi hnih aia tam champion thei chu Japan (4, Saudi Arabia (3), Iran (3), South Korea (2) leh Qatar (2) te an ni a; Qatar hi Asia football thiam ram zingah chhiar tel a ṭul ta.