Vawiin aṭangin MSL9

Mizoram chhunga basketball inelna sang ber Mizoram Super League Season 9 chu vawiin aṭangin R. Dengṭhuama Stadium-ah khelh ṭan a ni dawn. Tlai dar 5:30-ah Champhai BC leh Nursery BC an inkhel ang a, zan dar 8:00-ah Bungkawn LB leh Venghhlui VR4 te an inkhel ang.

MSL-ah hian team pariat Champhai BC, Nursery BC, Bungkawn LB, Venghlui VR4, Mission Veng Hotshots, Chanmari Vikings, Khatla TBL leh Zarkawt BCA te an awm a, vawi khat ṭheuh inkhelh kual hnuah a sang pahnihin semifinal an lut ang. Kum dang ang thoin All Star Game a awm dawn a; February 24, Inrinni zanah All Star Game hi a awm dawn a ni.

Tun season-ah MSL khel thar tur Nursery an phur hle. Michigan, USA aṭangin Dre Dentmond an chah chhuak a, 6ft 8in-a sang player hi a hnawksak tham ang. Nursery hian MSL khel pha tur hian kawng thui tak an zawh.

MBBA hnuaiah Nursery hian Third Division aṭanga bul ṭanin Second Division-a an inhlankai hnuah kum 2022 khan an champion. Kum 2023 khan Nursery hi First Division-ah an champion lehnghal a, MSL khel turin an tling. Vawiin tlai hian a vawi khat nan Nursery-in MSL an khel dawn a, an khelh hun hi a laklawh viau chungin entu an ṭhat ngei a rinawm.