TT inelnaah Alberto a champion

Mizoram Ranking Table Tennis Championships chu February 7-9 chhung khan Lunglei Chanmari Hall-ah khelh a ni a, inelna hi Lunglei District Table Tennis Association leh Mizoram Table Tennis Association ṭangkawpin an buatsaih niin 20th Battalion Assam Rifles ten an sponsor a ni.

Men's singles-ah Alberto LR Ruata, Electric Veng Table Tennis Club chu a champion. Final-ah Jeho Himnakulhpuingheta, Techmaze club chu set 4-1 in a hneh a ni. Alberto-a hi Jeho-a lakah tunhnaiah ṭum engemaw zah a zawnin a dingchang lo zawkah a ṭang ṭhin. Tun ṭumah erawh chuan team leh single-ah Alberto hi a dingchang zawkah a ṭang.

Inelnaah hian district hrang hrang - Kolasib, Champhai, Serchhip, Hnahthial, Lunglei leh Aizawl aṭang te in infiammi 161 an kal. Category hrang hrang 17 a awm a ni.