Bayern Munich hnehtu Alonso-a Leverkusen

'Bundesliga chu Bayern Munich ta a ni' tih ngawt theih a ni ta bik lo, na taka chuhpuitu an awm tlat. Xabi Alonso-a enkawl Bayer Leverkusen chuan Bavarians hi 3-0 in an hneh a, champion lai lakah hian point ngain hma an hruai fal.

Leverkusen tan Josip Stanisic, Alex Grimaldo leh Jeremie Frimpong ten goal khat ṭheuh an khung, mikhual Bayern Munich lamin goal an khung lo a ni satliah lo, striker Harry Kane awmna hian target zawnah vawi khat bak an ti kal thei lo.

Goal thum a lut

Inrinni zan inkhel kha a pawimawh, mikhual Bayern Munich kha chak ni se la chuan Bundesliga hmahruaitu an inthlak daih dawn - Alonso naute tan hmahruai sawhnghehtheihna hun remchang a ni thung.

BayArena-ah a tir aṭangin Leverkusen chu a hmuhnawm leh thiam zawk an ni. Minute 18-naah box chhunga ven loha awm Stanisic-a'n goal hmahruai a pet lut, a hmaah Bayern player pali ngawt an awm avangin ball a tlang thei kha a mak.

Second half tirah Bayern tlarhnung a pawp zui leh, midfielder Grimaldo-a'n Nathan Tella nen mawi taka ball an inpek hnuah angle zim angreng takah a khung a, hun tawp dawnah Jeremie Frimpong-a'n counter attack aṭangin a khung.

Goal thumna luh dawnah hian goalkeeper Manuel Neuer chu corner tauh tumin a tlan chhuak, mahse ball a tauh fuh lo - ball pet aṭangin Leverkusen hian an nawr let thut a, keeper awm lohnaah an khung a ni.

Beiseina chu

German football inelna sang berah Bayer Leverkusen hi an la champion ngai lo, hei vang hian 'Neverkusen' an ti fiam ṭhin. Kum 1996-97, 1998-99, 1999-2000, 2001-02 and 2010-11 te khan pahnihna niin, 'Vizekusen' (second-kusen) an ti ṭhin bawk.

Leverkusen tan nomawi chawi hi thil awlsam a ni lo, kum 31 liam ta khan German Cup an la, a bak chu an la champion leh lo - season kal laiah hian Alonso kaihhruaina hnuaiah mumang ramah an cheng mek, an hmalam erawh a la hautak dawn.

Alonso-a'n player a nih laia a khelhna Bayern Munich lakah 3-4-3 formation a hmang a, Bavarians hlauhawmna wing back hmet mitin mual sir lam an veng hneh hle. Nikum nipui laia Bayern aṭanga loan hmanga an hawh Stanisic hmangin Bayern an hrem.

Spanish manager Alonso naute an chak a ni satliah lo - Bayern an dangchat hneh lutuk kha khawvel mak tih a ni. Inelna hrang hrangah match 31 chu tlawm loin an kaltluang ta, hneh lo nei loa Bundesliga champion hmasa ber nih an la tum thei.

Bayern a buai?

Bundesliga bikah Bayern Munich hian tun hnai kum riat chhunga a vawi khat nan, match khatah shot vawi khat chiah an nei. Harry Kane an nei a, England captain hian goal khung theiin season duhawm hmang mah se Leverkusen lakah a hriam lo.

Thomas Tuchel-a'n Kane lakah rinna nghat viau mah se Tottenham striker hlui hian vawi 18 chauh ball a tawk a, target zawna shot a neih loh bakah goal khung theihna remchang a siam thei miah lo, atan zan duhawm lo a ni.

Kane hian Spurs tan nomawi a chawi thei lo a, kum 30 mi a nih tawh avangin a vanglai a liam chho ve mek - nomawi chawi duh vangin a zawna German champion vawi 11 ni thei a zawm, a season hmasa ber chu champion lo thei dinhmunah an ding mek.

Bayern Munich player pawimawh Thomas Muller chuan, "Tumah khan kan duh angin kan khel lo a ni ber a, zalenna nei lo ang mai kan ni. Leverkusen kha chuan risk an la ngam a, an ti fuh ta reng a ni," tiin team pahnih boruak a inang lo tih a sawi.