Aizawl FC-in Mohammedan an chelh

Aizawl FC-in coach thar Stojkoski Bobi hnuaia an match hmasa berah Mohammedan SC nen goal awm loin an inhnehtawk. RG Stadium-a I League inkhel hi kartawp a ni bawk nen inkhel entu an ṭhahnem a, Mizo club-in result ṭha an neih zel theih chuan entu an tam zel ang.

Stojkoski Bobi kaihhruai AFC hi an zin chhuak leh phawt dawn a, February 15, Ninganiah Delhi FC an hmachhawn dawn. Hemi zawh hian a zawn zatin home match nga an nei dawn a; Sreenidi Deccan (Feb 19), Rajasthan FC (Feb 23), Real Kashmir (Feb 28), Trau (Mar 2) leh Shillong Lajong (Mar 9) te an mikhual ang.

Aizawl FC thar

Mizo club-in B. Malsawmzuala hnuaiah result ṭha an hlawh chhuak a, coach thar Bobi hnuaia point khat hlawhchhuah hi result chhia a ni lo.

Bobi hian rinrawl angin Electric Veng FC aṭanga an lakluh Lalhriatpuia bul a ṭantir nghal a, Farkawn tlangval C. Hriata hi a khel chhe lo. Polish midfielder Rafal Zaborowski pawhin bul a ṭan a, inkhel tidanglamtu a ni pha lo.

Iranian forward Amir Memari erawh training-naah a ṭha tawk lo a, Mohammedan laka bench-a a ṭhu tluan hi a mak lo. January transfer-ah AFC an inthuam ṭha a, coach Bobi hnuaia eng ang chiaha ṭha nge an nih dawn tih hi hriatthiam a la har hle.

Aizawl FC-in passing football an khel ngam lo a, keeper Nora Fernandes-a'n goal kick zawng zawng na takin a pet chhuak vek. Tlarhnungin ball an vawrh nasa a, midfielder-ten ball sem tur an nei lo. AFC player-te goal venhim tumin an tlan nasa a, vanneihna nen point khat an hlawh chhuak.

Mohammedan an vanduai

Ṭan phat aṭangin Mohammedan-in na takin an nawr nghal a, Mizo club hi an mualah 2-1 a an hneh tawh avangin khualmualah pawh an ngam. Eddie Hernandez-a'n box awn aṭangin keeper a rum ṭhaih a, goalkeeper Nora Fernandes a khel ṭha.

Mohammedan hian first half-ah ṭum hnih penalty an beisei a, referee-in a pe lo ve ve. First half tawp dawn chiahah David Lalhlansanga'n keeper chauh a hmachhawn a, goal-ah a chantir thei lo. Second half-ah pawh Mohammedan bawk an chungnung.

Mizo tlangval David-a ball pass ṭha chu Eddie-a'n hnai tak aṭangin a hlah a, AFC left back Lalhrezuala'n ṭha zetin Mohammedan forward chance ṭha bik nei tur a pet chhuahsak hman bawk. Mizo club-in hun tawp dawnah goal khung theihna remchang an nei a, substitute KC Larchhuakmawia chu Mohammedan defender-in a tibuai hman.

Inkhelh banah Mohammedan coach Andrey Chernyshov chuan, "Mohammedan hi I League-a team ṭha ber kan ni a, point kan hmu hnem ber bawk. Referee-te hian min duhsak lo a, penalty min pek loh chhan kha ka hretthiam lo. Ka naute an thawkrim a, an khelh danah ka lawm. Mahse kan khelh ṭhat phu khawp point kan hlawh chhuak lo," tiin Vanglaini a hrilh a, Mizo player paruk a enkawlte enkawl nuam a tih bakah an ṭha a tih thu a sawi tel bawk.

Aizawl FC coach Stojkoski Bobi chuan, "I League hmahruaitu laka point khat hmuh hi result ṭha a ni. Hmasawn zel kan tum ang. Tunah chuan Delhi FC kan hmachhawn tur atan kan insawrbing ang," tiin Vanglaini a hrilh.