Enzo ringtawktu Pochettino

Chelsea manager Mauricio Pochettino chuan goal khung kawnga an harsatna ṭhenkhat an sukiang tih a sawi a, midfielder pahnih Enzo Fernandez leh Conor Gallagher te thawhrimna chu a hunah tak a rawn lang tih a sawi.

Argentina international Enzo hian Aston Villa lakah mawi takin freekick a chhuih lut a, an goal hmahruai chu Gallagher-a khung a ni bawk. Zanin dar 1:30 hian Crystal Palace nen Premier League an khel dawn, mawhphurhna sang tak an nei leh ang.

Blues manager Pochettino chuan, "Conor leh Enzo te hi player ṭha leh thawkrim tak an ni a, training-na hmunah theihtawp takmeuh an chhuah ṭhin. Ball sem mai bakah a khung dan pawh an zir nasa, an thawhrimna rah chu a hunah a rawn par chhuak.

"Enzo inkhel kha en ila, nuamti takin football a khel. Player ten nuamti taka an khelh tawh chuan thil ṭha dangin a rawn zui mai ṭhin, match lehpekah pawh boruak ṭha hi kan neih chhunzawm ka ring.

"Season tir lamah pawh khan ṭha tak taka khelh chang kan nei, ngelnghet taka kan khel ṭha rei thei lo kha a pawi lai chu a ni. Villa lakah ṭha takin kan khel a, player ten an phu ang ngeiin hnehna kan chang. Tunah pawh Palace lakah kan ṭhatna lantir kan tum dawn," a ti.

London club hian striker hriam tak an neih loh avangin an buai fo, hei vang hian midfielder goal khung thei neih hi an mamawh zual hle.