Liverpool an chak ve leh ta - a chung berah an awm

Arsenal laka an tlawm hnuah Liverpool an insiamṭha nghal a, Inrinni zan khan Premier League inkhelah Burnley chu 3-1 in an hneh - table chung ber an luah chhunzawm a, Manchester City aia match khata khel tamin point hnihin an sang zawk.

Everton lakah 2-0 a City an chak thu hre sain Reds an inlan a, Diogo Jota hmanga goal hmahruai an khung hnuah Dara O'Shea chuan Burnley tan sut mah se, Luis Diaz leh Darwin Nunez ten goal khat ve ve khung ve lehin, 3-1 in Liverpool an chak.

Hetihlai hian season chawhma lama champion sawi ri, tuna Champions League khelh phak tum ta Tottenham Hotspur chuan 2-1 in Brighton & Hove Albion an hneh a, Brighton hian Pascal Gross-a penalty hmangin hmahruaina goal khung mah se, Pape Matar Sarr leh Brennan Johnson ten goal khat ve vein an chhanglet.

Newcastle United chuan khualmualah 3-2 in Nottingham Forest an hneh a, Magpies tan Bruno Guimarães chuan goal hnih khungin, Fabian Schar chuan goal khat a thawh bawk. Forest tana Anthony Elanga leh Callum Hudson-Odoi goal khungin awmzia a nei phak lo.

A hunah tak

Liverpool tan Arsenal laka chesual first-choice keeper Alisson chu dam lohna avangin a inlan thei lo a, a hmun ruakah Caoimhin Kelleher a ding - kum 25 mi keeper hi League Cup-ah a theihna kan hmu fo a, Anfield-a inkhel an nih bawk avangin Reds tan hlauhthawnna tur a awm lo.

Reds-in an chak loh chuan table-ah pahnihna an ni dawn tih an hria a, Burnley lakah chak an tum - an duh ang ngeiin minute 31-naah Jota chuan goal hmahruai a khung a, Trent Alexander-Arnold-a corner aṭanga ball kal chu Burnley keeper James Trafford-a'n a man theih loh hnuah Jota hian a tauh lut.

Mahse, Burnley an zam duh lo. Minute 45-naah Dara O'Shea chuan ṭha zetin a tauh lut ve leh a, 1-1 a ni. Goal dang lut loin chawlhlawk hman a ni a, Burnley an phur - an phur chhung erawh a rei lo hle.

Second half ṭan aṭanga minute sarihnaah Luis Diaz chuan Reds tan a khung leh a, 2-1 a ni. A la tawk zo lo cheu - tun hnaia sawisel hlawh tak Darwin Nunez chuan goal khung a thiam reng tih pholangin an goal thumna a khung a, 3-1 in Reds an chak.

Lawmna leh lawm lohna

Liverpool-in harsa loin Burnley an hneh a, hetihrual hian thil lawmawm lo a awm - Trent Alexander-Arnold chu hliam vanga lakchhuah a ṭul a, English defender hian a khupah hliam a nei.

Reds manager Jurgen Klopp chuan, "Thil hlauhawm tak a ni loah ka ngai a, mahse, na a tih avangin kan la chhuak. A hliam dinhmun dik tak kan hre thuai ang," a ti a, he thu buatsaih a nih lai hian a dinhmun chiang taka sawi theih a la awm lo.

Klopp chuan sawi zawmin, "A inkhelh lai khan a na tih kan hre tawh a, Trent kha ka zawh hnuah a khelh theih thu a sawi. Mahse, a sawi ang ngawt a lo nih loh deuh avangin fimkhur thu hlaah kan la chhuak a ni," a ti.

Hetihlai hian thla li zet hliam vanga a chawlh hnuah fullback Andy Robertson chuan a vawi khat nan inkhel bul a ṭan ve leh a, Reds ṭantuten Scottish defender lo kir leh ta hi hmuh nuam an ti ang - Anfield Road stand thar chu a vaia hawn a nih tak avangin mi 59,896-in inkhel hi a hmunah an en a, Anfield-a league match entu an tam ber ṭum a ni.

Inkhel dang

Spurs khelmualah Brighton-in chak tumin an khel ngam a, Micky van de Ven chuan Danny Welbeck laka a foul avangin penalty a chawi nghal a, minute 17-naah Pascal Gross chuan hei hi goal-ah a chantir.

London club-in si phurh an sut lawk thei lo a, goal khung loa chawlhlawk an hman avangin fans an hlauthawng hman. Mahse, minute 61-naah Sarr chuan si phurh sutna goal a khung a, hun pek belh minute ruknaah Brennan Johnson chuan chakna goal a khung zui.

Asian Cup a khelh vanga a thang bo reng hnuah Son Heung-min pawh Spurs jersey nen a inlan ve leh ta a, si phurh an sut hnuah South Korean forward hi bench aṭanga luhtir niin, Johnson-a goal khung hi a siamsak a ni.

Forest khelmualah Magpies-in Guimarães leh Schär hmangin vawi hnih hmahruaina goal an khung a, Forest-in Elanga leh Hudson-Odoi hmangin an sut ve ve. Mahse, minute 66-naah Guimaraes chuan khung ve lehin, 3-2 in Newcastle an chak.