Goal li khungtu Real Madrid tan champion a hnai

Real Madrid chuan Inrinni zan khan league nomawi chawi tura an elpui Girona chu 4-0 in an sawp a, La Liga hmahruaitu an nih chhunzawm zel - an hnuai chiaha awm Girona ai hian point nga laiin an sang fal ta.

Real tan Jude Bellingham bawk chu player langsar a ni a, goal hnih a khung - Vinicius Junior leh Rodrygo ten goal khat ve ve an khung bawk a, Girona-in a chhanletna tur an neih loh avangin Santiago Bernabeu-ah an tlawm.

Girona hi tun season-a league match 24 an khelh tawhah vawi hnih chiah an la tlawm a, Real Madrid lakah ve ve a ni. An elpui ber an ngam loh miau avangin Girona tan Real chetsual ngaihchan tel a ṭul tawh dawn a, champion ai chuan Champions League khelh tum chu an tan a finthlak tawh zawk mai thei.

Nizan khan Barcelona leh Atletico Madrid te an inlan a, he thu buatsaih a nih lai hian result kan hre hman lo. Zanin dar 1:30-ah inkhel pakhat a awm ang a, Almeria leh Athletic Bilbao an intawng ang.

A goal hma

Santiago Bernabeu-a inkhelah Real-in goal khung turin an nghah rei a ngai lo. Minute rukna lekah Vinicius Jr chuan mawi zetin goal hmahruai a khung a, Brazilian forward goal khung hi goal ṭha bik a ni.

Vinicius a hnawksak chhunzawm a, minute 35-naah Bellingham-a tlan lut tur hmu fuhin, mawi lutukin ball a thlawh lut a, English midfielder hian ṭha taka um lutin, Girona keeper Paulo Gazzaniga a bum hnuah mawi zetin a khung.

Goal dang lut loin chawlhlawk hman a ni a, Girona an insiamṭha chuang lo. Real bawk chu goal khungtu an ni a, a khungtu pawh Bellingham tho a ni - Vinícius-a chance neih chu Gazzaniga chuan lo dang hman mah se, a per lehlam chu Bellingham hian a khung.

Minute 61-na a ni a, Rodrygo hun a her chhuak ve thung. Brazil tana a khelhpui Vinicius-a ball pek chu ṭha taka a tlan luhpui hnuin goal-ah a chantir a, Girona lakah Real-in zahngaihna an lantir lo.

Hey Jude

Girona lakah Vinicius a che ṭha a, mahse, Bellingham-a'n goal hnih a khung leh avangin English midfielder chanchin bawkin sawi a hlawh - tun season inelna hrang hrangah match 29 khelin goal 20 a khung a, assist vawi riat a nei tawh bawk.

Spanish football journalist Guillem Balague chuan, "Madrid khawpuiah chuan Jude-a thiamzia hi mak tiin an thlir a ni," a ti thlawt a, "Tun hnaiah goal a khung tam tawk lo a, hei hi tlarhma piah lamah defensive-a tel tam tura an tih vang a ni," a ti bawk.

Vinicius pawhin Bellingham che ṭha a lawmpui a, Brazilian forward chuan, "Goal tam tak a khung a, a khung zel pawh ka beisei. Tun season-ah ani aia ṭha an awm lo a, season pawh kan hmang ṭha - chhungkua kan ni a, kan inlawmpui em em vek a ni," a ti a, mahse, Bellingham hi ker rek hliam vangin lakchhuah a ni.

Real hi league match 18 zet chu tlawm nei loin an kaltluang ta a, kum 2021 hnua tlawm nei loa an kaltluan rei ber a ni. Real hian Thawhlehni zanah Champions League last 16 khel turin RB Leipzig an lenchilh dawn a, Real boss Carlo Ancelotti chuan, "Thawhlehni zanah a inlan theih hram ka beisei," a ti a, a hliam na lo niin a lang.