Odisha-in hma an hruai chhunzawm zel

Indian Super League-ah Odisha FC chuan table chung ber an luah chhunzawm zel a, Zirtawpni zan khan an mikhual FC Goa chu 1-1 in an inhnehtawkpui - Odisha hian point 31 an nei mek a, anmahni hnaih bertu Goa aiin point thumin an sang zawk.

Hetihrual hian Goa hian league match thumin an khel tlem zawk a, Odisha tan hahdam chi a la ni lo. Mualneitu Odisha tan hian Roy Krishna chuan goal hmahruai a khung a, Jay Gupta hmangin Goa hian an chhanglet a, goal dang a lut tawh lo.

Odisha tan Jerry Lalrinzuala, K. Lalṭhathanga leh Isak Vanlalruatfela ten inkhel bul an ṭan. Inrinni zan khan inkhel pahnih a awm a, NorthEast United chuan 3-2 a East Bengal hnehin, Mohun Bagan chuan 2-0 in Hyderabad an hneh thung.

NorthEast tan Tomi Juric chuan goal hnih khungin, Nestor Albiach chuan goal khat a khung thung. Kolkata club tana Nandhakumar Sekar leh Felicio Brown Forbes ten khung ve mah se, awmzia a nei phak lo - East Bengal tan hian defender Lalchungnunga chuan inkhel bul a ṭan.

Hetihlai hian Mohun Bagan chuan team talbuai Hyderabad chu 2-0 in an hneh a, Anirudh Thapa leh Jason Cummings ten goal khat ve ve an khung. Bagan tan midfielder Lalrinliana Hnamte chu bench aṭanga luhtir a ni.

Hyderabad tan Jeremy Zohminghlua chuan inkhel bul ṭanin, ISL-a a match hmasa ber a khel a, Mark Zothanpuia, Lalchhanhima Sailo leh Ramhlunchhunga ten inkhel bul an ṭan bawk - Amosa Lalnundanga leh Aron Vanlalrinchhana te chu bench aṭangin an lut thung. Zanin dar 7:30-ah ISL inkhel pakhat a awm dawn a, Kerala Blasters-in Punjab FC an mikhual ang.