AS Roma tan Inter Milan an la sang mah mah

Daniele De Rossi hoin AS Roma an harh thar a, a zawnin vawi thum lai chak thei mah se an tan Inter Milan meuh chu an la sang mah mah. Serie A hmahruaitu Inter hian 4-2 in an lo hneh.

Inrinni zan San Siro-a inkhelah Inter tana Francesco Acerbi goal khung chu chawlhlawk hmain Roma lamin Gianluca Mancini leh Stephen El Shaarawy te hmangin an chhanglet a, 2-1 in chawlhlawk an hmang.

Second half-ah erawh team ṭha danglamna a lang - champion tuma hmalam pan lai Inter hian Angelino leh Alessandro Bastoni te hmanga khung belhin, anmahni mualah point thum an hlawh chhuak.

Chak lo lam AS Roma manager De Rossi chuan, "Kan chak loh avangin hrehawm chu kan ti ngei a, chutihrualin team nghet tawh tak leh keini aia ṭha zawk laka kan khelh dan khan min tilawm, a hniam zawk kan ni chunga kan beih dante kha lawmna tur tam tak a awm.

"Verona leh Salernitana laka kan khelh ang ngawt khan thil a tih vek theih loh tih chu hriatsa a ni a, chutiang chung chuan ṭha takin Inter Milan kan hmachhawn niah ka ngai," a ti. Roma hi match li a kaihruai tawh a, vawi khat chiah an la tlawm a ni.

Inter Milan coach Simone Inzaghi chuan hrem vangin a naute hi a hmunah a kaihruai thei lo a, assistant coach Massimiliano Farris hoin an inlan.

Faris chuan, "Roma khan an khel ṭha em em a, an goal pahnih kha dan a harsa takzet.

"Mahse, second half-ah kha chuan a ṭha leh puitling zawk kan nihna a lang ve thung. A pumpui thlir chuan minute 20 chhung vel a khel ṭha lo zawk kan ni a, a dangah chuan kan chungnung," tiin a sawi.