Hamilton leh Mercedes an kal fawr

Lewis Hamilton chuan Formula 1 Belgian Grand Prix-ah hnehna a chang a, car intlansiakna sang berah hian vawi 89 a chakna chiah a ni. Season kal laiah hmahruaitu a nihna chu a nemnghet zel bawk.

Pathianni zan intlansiakah Hamilton-a teammate Valtteri Bottas chu pahnihnaah a thleng - Mercedes driver pahnih el phak an awm leh ta lo. Max Verstappen-a'n a zawna a vawi ruk nan dawhsan (podium) lawn phak mah se pathumnaah a lungawi a ṭul.

Qualifying an tlan lai aṭangin Hamilton a chungnung nghal, a teammate Bottas hmaah awmin a hmasa ber aṭangin intlansiak bul a ṭan. 4.3km a thui Spa‑Francorchamps tlan kawnga an tlan laiin harsatna a tawk lem lo.

Vawi 55 an tlan kualah Hamilton hian hma a hruai vek a, kawngkawi harsa leh khirhkhan 19 a hmachhawnah pawh tihsual a nei lo. Tun hnai inelna neih hnuhnung paruk aṭangin vawi nga zet hnehna a chang thei.

Britain tlangval hian intlansiak dang pahnihah hnehna a chang leh a nih chuan, chak hnem record neitu Michael Schumacher (91 wins) a nih rual thei dawn, a nomawi kawl lai a humhim a nih pawhin German legend (7 tiltes) chu a nih rual chiah bawk ang.

Lewis Hamilton chuan, "Awlsam tak angin a lang a ni mai thei, a nihna takah chuan a awlsam bik lo, hnehna chang tur khan ka theihna zawng zawng ka hlan. Ka elpuite chet ṭhat ber ṭum a ni lo hlauh a, chuh buaitu nei lutuk loin ka chak thei mai zawk a ni," a ti.

World champion vawi ruk ni tawh Hamilton hi a hnunga awm Bottas aiin 8.4 second ngawtin a thleng hma zawk. Bottas hian a ṭhianpa Lewis chuan hnehna chan a phu thu leh, inelna tak neih hma qualifier aṭang tawha che ṭha ber a nih thu a sawi ve bawk.

Red Bull driver Max Verstappen chuan, "A nihna takah chuan Mercedes car kha kan umphak ngang lo a ni, pathumna nih tum mai loh kha chu tih theih kan nei lo. Lap hnuhnung lam pariat chinah khan thil nih tur ang chu a thleng zo tawh, kan dinhmunah erawh ka lungawi," a ti.

Team hlun leh ṭha ni si, mahse tun hnaia beisei phak lo Ferrari an che fuh hleithei lo. Sebastian Vettel leh Charles Leclerc ten 13 leh 14-na aṭangin bul an ṭan a, an dinhmun ngaiah bawk an hun tawp pawh an hmang - an tan nomawi beisei ngam a ni tawh lo ang.

World champion vawi li ni tawh Vettel-a'n car sen khalh chunga a season hnuhnung ber a hmang mek a, Red Bull driver hlui hian a hun tawp lamah pawh ngai a awh thei ta lo; season tharah eng tiangin nge a awm chhunzawm dawn tih chu zawhna lian tak a ni.

Season kal laiah intlansiak vawi 10 an hmachhawn tawh a, tlan hmabak dang pasarih a la awm. August 6, Pathianni zan hian Monza-ah Italian Grand Prix an tlan dawn; Ferrari tan an hmunpui a ni a, Italian team hian thawh chhuah ngei an tum ang.