Thiem-a'n hun ṭha a her chhuah beisei

Dominic Thiem chuan US Open inbuatsaihna tournament-ah hneh nei lo mah se beisei a la nei sang zel a, hard court inelna lianah chuan atan hun ṭha a inher chhuah ngei a beisei - zanin dar 9:45 hian Jaume Munar nen an inhmachhawn ang.

Kar hmasa khan Flushing Meadows, New York-ah Western & Southern Open an khel, inelnaah hian Thiem chu a match hmasa berah a chak lo nghal. Covid-19 vangin hun rei tak chhung an inkhel mumal lo a, an khelh chhunzawmnaah a che fuh lo deuh a ni.

US Open seeeded pahnihna Thiem chuan, "Chet fuh loh leh khelh fuh theih miah loh ni hi chu a awm ve ṭhin, match zawng zawngah ṭha taka khelh hi chu a harsa tih pawh ka hrechiang hle. Chutihrualin khelh fuh ni pawh a inher chhuak ve fo tho tih hriat a ṭha.

"Ka theihna leh nihna ka hrechiang a, inelna lian US Open-ah chuan ka tan hun ṭha a rawn herchhuah ngei ka beisei tlat a ni. Tun hma ang kha a ni thei rih lo a, chak loh hnuah pawh hrileng vangin awmna ngaia awm chhunzawm rih a ngaih avangin a boruak a danglam dawn," a ti.

Thiem hian French Open final vawi hnih a khel tawh a, mahse a chak lo zawkah a ṭang ve ve. Grand Slam dangah pawh beiseiawm leh hmuhnawm zinga mi a ni ṭhin - major title erawh a la chawi lo. Rafael Nadal leh Roger Federer te awm loh hlanin beisei a nei sang ang.

Coronavirus vanga an chawlh hma khan Brazil-ah tournament an khel a, he inelnaah hian Thiem-a'n Munar a hneh; hri leng vanga an chawlh hnuah player pahnih hi an intawng zui leh dawn, Austrian tlangval Thiem hi chak zawk tura rinkai a ni.