Afcon 2023 champion Ivory Coast: Cancer natna ngamtu Sebastien Haller

Sebastien Haller-a'n hun pawimawh laiah player ṭha danglam a nihna a lantir a, chakna goal khungin Ivory Coast chu Nigeria lakah 2-1 in a chakpui, a vawi thum nan Africa Cup of Nations champion an ni.

Pathianni zan Afcon 2023 final-ah Nigeria lamin William Troost-Ekong hmangin goal an nei hmasa a, second half-ah Elephants lamin Franck Kessie leh Sebastien Haller te hmanga chhangletin an lehthal.

A tawpah Ivory Coast

A thlengtu an ni bawk a, mipui 60000 chuang lenna Olympic Stadium of Ebimpe chhunga inkhel entu tam zawk chu serthlum rawng (orange) kawr hatu an ni, a tir phat aṭangin an thawm pawh a ṭha hem hem hle.

Mual sir lamah Simon Adingra a hmuhnawm, kum 22 mi winger hian Nigeria tlarhnung a chhaih buai hneh hle a, mahse Brighton player hi a vannei mai lo thung, goalkeeper Stanley Nwabali a paltlang thei tlat lo.

Haller pawhin a remchang hmuh hmasak a tlawh lut lo, goal nawr na viau mah se a khung hmasa chu Nigeria lam an ni daih. Corner aṭanga ball kal an tauh chhuah fuh tawk loh avangin William Troost-Ekong chuan chiang zetin a tauh lut.

Second half-ah pawh Ivory Coast lam bawkin an nawr na, goal khung erawh an harsat tho. Minute 62-naah Franck Kessie-a hun a inherchhuak ta, amah vengtu awm mah se corner aṭanga ball kal chu chiang lutukin a tauh lut.

Minute 81-naah Haller tak tak kan hmu, a sir aṭanga Adingra-a cross kha a lai deuh angin lang mah se Dortmund striker khan sang taka a ke khaiin a tlawh lut - a siamsaktu hi a phu ang ngeiin Best young player atan thlan a ni zui bawk.

Cancer ngamtu

Nikum nipui laia Erling Haaland a chhuah khan Borussia Dortmund chuan striker an zawng a, an duh an lak chu Sebastien Haller hi a ni, vanduai thlak takin a club thar tana match pangngai pawh a khelh hmain a tilmu a cancer tih an hmu chhuak hlauh.

Thla sarih chhung enkawl a ni a, a hun harsaah hian a club chuan an phatsan lo. Kum 2023 February thla khan Dortmund tana a goal hmasa ber a khung, club tan ṭha taka a khelh aṭangin an ram tan pawh inkhel tura koh a ni.

Afcon tir lamah khan a khel ṭha nghal mai bik lo, mahse a rei hnuah a theihna tak a pho lang. Semifinal-a DR Congo an hnehna goal awmchhun khungin, tunah chuan an champion theihna goal a khung leh ta.

Kum 29 mi Haller chuan, "Tun hnai thla 18 chhung chu kei leh kan chhungkaw tan hun harsa tak mai a ni, tun hun kan tawng mai hi thil mak a ni zawk hialin ka hra. He hun thleng tur hian vawi tam tak duhthu ka lo sam tawh ṭhin.

"Hringnunah hian thil tam tak a lo thleng ṭhin, hun harsa ka tawh lai kha ka hlauthawngin ka zam thei hle. Mahse, min enkawltu khan hlau lo turin min fuih tlat a, a thusawite kha ka tan chuan a hlutzia ka hre thar," a ti.

Boruak inthlak

A tira ruahman dan chuan Afcon 2023 hi nikum June leh July thla khan khelh tur a ni, mahse, inelna thlengtu Ivory Coast chuan Africa ram laili leh thlang lama ruah sur hun a nih avangin a hun sawn an dil, tournament hming tidanglam loin kumin atan hian an sawn.

Ivory Coast hi a thlengtu an nih vang leh, player an neih ṭhat avangin champion tura rinkai an ni. Mahse, a tir lamah beisei an phak lo - Equatorial Guinea lakah 4-0 ngawta an mualpho hnuin coach Jean-Louis Gasset an ban.

Coach lailawk Emerse Fae hoin knocout stage aṭangin an khel a, a tawpah chuan an ram mipuite hmaah hnehna hlado chham chungin Afcon nomawi chu a vawi thum nan an la, an zinkawng ngaihnawm hi an hre reng tawh ang.

Fae-a ho hian champion lai Senegal leh Mali te lakah si phurh sut hramin, a tawpah an ding chang zawk - DR Congo laka tlang turin an goal neih chhun an hum thei a, tunah chuan vawi thum champion tawh Nigeria an hneh.

Player a nih laiin Fae hian Afcon 2006 final kha an ram tan a khel, mahse nomawi inchuhna inkhelah Egypt an ngam lo - tunah erawh coach ni chungin an ram a hlawhtlinpui - Afcon thlengtu ni chunga champion thei ram 12-na an ni nghal bawk.