Jude Bellingham-a'n Champions League khel thei dawn lo

Real Madrid chuan zanin dar 1:30 hian Champions League round of 16 khel turin RB Leipzig an lenchilh dawn a, mahse, an thiampuipa Jude Bellingham chu ke rek hliam vangin Germany-ah an hruai ve thei dawn lo.

La Liga hmahruaitu Real hian an league match hnuhnung ber chu Inrinni zan khan khelin, Girona chu 4-0 in an sawp - he inkhelah hian Bellingham chuan goal hnih a khung a, a team tan a thawhhlawk hle.

Hliam vangin lakchhuah a ṭul zui a, coach Carlo Ancelotti chuan a player hi Thawhlehni zanah an chhawr theih a beisei thu sawi mah se, rin aiin a hliam hi a lo 'serious' niin a lang a, Bellingham tel loa inlan a ṭul dawn.

Kum 20 mi Bellingham hian tun season ṭan dawn khan Borussia Dortmund aṭangin Real hi a pan a, Spanish club a zawm hnuah inelna hrang hrangah match 29 khela goal 20 khungin, assist vawi riat a nei tawh bawk.

Bellingham hliam dam hun tur hi Real chuan an tarlang lo a, "A dinhmun uluk taka thlithlai zel a ni ang," tih bak an sawi thei rih bik lo. Hetihlai hian Real tan lungphan lutukna tur niin a lang lo a, tun hnaia form tak Vinicius Junior leh Rodrygo an nei.

Brazilian forward Vinicius hian tun season inelna hrang hrangah match 21 khela goal 12 khungin assist vawi sarih a nei a, Rodrygo hian match 34-ah goal 13 khungin, assist vawi sarih a nei thung - player pahnih hi zaninah pawh Leipzig tan ven bik tur an ni ang.

RB Leipzig hian Manchester City, Young Boys leh Red Star Belgrade te nen group khata awm chungin Champions League round of 16 hi an lut a, Marco Rose-a enkawl team hian season hmasaa an paltlang zawh loh last 16 paltlang hi an châk dawn.

Chutihrual chuan an league match hnuhnung parukah vawi khat chiah an chak a, insiamṭhat nana Real hman chu a harsa mai thei - tun season inelna hrang hranga match 30 a khelh aṭanga goal 19 leh assist vawi li nei tawh Lois Openda mawhphurhna a sang ang.