Kan fimkhur dawn - Pep Guardiola

Manchester City chuan zanin dar 1:30 hian Champions League round of 16 khel turin FC Copenhagen an lenchilh dawn a, City boss Pep Guardiola chuan chak tura rin kai zawk ni mah se an khingpui tur chu uluk taka an zirchian tur thu a sawi.

Pep chuan, "Tun Champions League-a group hautak ber pawlah Bayern Munich, Manchester United leh Galatasaray te nen an awm ho a, mahse, round of 16 an lut thei a ni," a ti a, Danish club lakah a ṭawng fimkhur hle.

Danish champion hian Champions League hi second qualifying round aṭanga khel ṭanin, qualifier match thum an chak hnuah group stage khel turin an tling a, group stage draw neih a nih khan round of 16-a lut tura beisei zingah chhiar tel an ni lo.

Mahse, kum 35 mi lek coach Jacob Neestrup enkawlna hnuaia khel Copenhagen hian khualmualah Galatasaray (2-2) leh Bayern Munich (0-0) chelh theiin, Old Trafford-ah United ngam lo mah se, an mualah 4-3 in an hneh bawk a, match ruka point riat hmu chungin an tlang.

Pep chuan, "Kum hnih liam taah khan Copenhagen hi kan lenchilh tawh a, mahse, kan chak zo lo. Uluk takin he team hi ka zirchiang dawn a, ka coaching staff-te thurawn pawh uluk takin ka ngaithla ang. Ka tawnhriat aṭangin sawi ta ila, round of 16 first leg hi fimkhur a ṭul a, Sporting Lisbon laka 5-0 a kan chak tih lohah kha chuan harsa ka la ti vek a ni," a ti!

Season hmasa Champions League-ah khan team pahnih hi group stage-ah an lo intawng tawh a, City hian Etihad Stadium-ah 5-0 in sawp mah se, khualmualah erawh 0-0 in an inhnehtawk a, Pep-a'n he thil thleng hi a la theihnghilh lo.

Mahse, Pep chuan tun hnaia an result avanga beiseina a neih san thu sawiin, "Ni tina an training lai ka en hian, hlawhtlin duhin an la tuihal reng a ni tih ka hmu. Champions League-a kan match khelh zawng zawngah hnehna kan chang vek a, tun dinhmun hi kan thleng ta.

"Ka team-te hian nomawi chawi zel an duh a, chutianga an duh chhung chuan kan khingpui tan hmachhawn hautak kan ni reng ang," a ti. Tun hnaiah hliam vanga chawl reng Erling Haaland leh Kevin de Bruyne an lo kir leh tawh bawk a, City hmachhawn hi thil châkawm a ni lo.