Ennawm a awm nghal : TBL Vs BCA

Mizoram Super League awm hnua basketball club inhal bera chhal ngam chu Khatla TBL leh Zarkawt BCA te hi an ni a, MSL vawi riat khelh tawha team pahnih champion zat belhkhawm chu vawi sarih a ni.

MSL9-ah Khatla TBL leh Zarkawt BCA te hi an inkhel nghal dawn a, zanin dar 8:00 hian R. Dengṭhuama Stadium-ah an inhmachhawn dawn. Tlai dar 5:30-ah Mission Veng Hotshots leh Chanmari Vikings te an inkhel bawk ang.

MSL hmasa pahnihah Khatla TBL an champion a; MSL4 aṭangin Lalrina Renthlei telna Zarkawt BCA an champion ṭan a, MSL7 thleng an champion. Inelna hnuhnung berah TBL-in BCA chu an lalṭhuthleng aṭanga hnuk thlain nomawi an chhuhsak.

TBL hian lallukhum hi humhim ngei an tum a, tun season-ah BCA lakah ṭum hnih an chungnung tawh. MBBA Season Opening leh MBBA Cup final-ah team ṭha pahnih hi an inhmachhawn a, Khatla TBL an chak ve ve.

A tawi zawng chuan Khatla TBL hian final-ah a zawnin vawi thum an hneh tihna a ni. TBL coach H. Lalhruaitluanga chuan, "A harsa dawn khawp mai. An foreinger ṭhat dan kan hrethiam si lo a, inzir lawk theih a ni lo. Keini erawh Joshua Keyes bawk kan lakluh avangin kan foreigner hi an hrechiang tawh," tiin Vanglaini a hrilh.

TBL hian Joshua Keyes bakah Vanlalṭhazuala, Eddie Zaithanmawia, Michael Liansanga, K. Lalthianghlima leh Lalliansanga te an kawl a, an inringtawk khawp ang.

Chutihrualin Zarkawt BCA-in vanglai hun hman nawn leh an tum a, boruak thar hip nan Lalruatfela aiawhtu turin MSL3 aṭanga coaching staff-a tel Marc Lalthlamuana Sailo chu team enkawl turin an ruat.

Marc chuan, "Kan foreigner lakluh Emmanuel Malou hi 6ft 8in a ni a, position hrang hrangah a khel thei vek. Kan team chakna petu a ni thei dawn a, chutihrualin Mizo player-te an pawimawh dawn," tiin Vanglaini a hrilh.

Zarkawt BCA coach March hian a zawn zatin Mizoram Sub Junior team chu national-ah vawi thum a champion pui thei a, nikum khan Mizoram pum huapa Inter District School Tournament-ah Aizawl North chu a champion pui.

MSL nomawi laklet ngei tumin BCA hian Lalnunpuia Renthlei (R-a) an la lut a; Lalrina Renthlei, Matthew Sailo leh Zonunsanga te ho nena an inkawp tur chu hmuhnawm a tling ang.