Goal sur tirtu Arsenal
An buaina pakhat chu goal khung a ni ṭhin a, tunah erawh an chingfel chho mek - Arsenal chuan West Ham lakah 6-0 in hnehna an chang a, an elpui dangte hriat turin Premier League nomawi an chuh ngam tih a takin an lantir.
Premier League table chung berah Liverpool an la awm a, pahnihna Manchester City chuan match hmabak an neiha an chak chuan Reds an tlan pel ang - pathumna Gunners hian Jungen Klopp-a naute hi point hnihin an thlau, match khat lekah an dinhmun hi a la inthlak vek thei.
Laipui a puak
London Derby a ni a, season hmasa kha chuan Gunners chetsual tawhna a ni. Pathianni zan London Stadium-a inkhelah erawh Mikel Arteta nauten a khat mawi takin goal an khung reng mai a ni.
William Saliba leh Gabriel ten an tauh lut a, a siamsaktu chu Declan Rice a ni. Hammers captain hlui hian corner leh freekick aṭangin an defender pahnih tauhluh tur hi a siamsak a, box pawn aṭangin goal mawi a khung bawk.
England international Rice hi West Ham captain hlui a ni a, a goal khung hi a lawm duh lo - an chak dawn tih a chian tawh avangin Arteta chuan a midfielder ṭha hi a la chhuak zui, khelmual a chhuahsan dawnin fans lamin zahna an lo lantir.
Arsenal tan Bukayo Saka-a'n penalty a khung bakah inringtawk tak maiin goal dang a khung a, forward Leandro Trossard pawhin inkhelh tam a phu tih lantir nan goal a khung ve bawk - goal ṭha tak vek an ni hlawm.
Arteta thu leh hla
Gunners manager Arteta chuan, "Inkhelh hma khan tun hi West Ham hneh tura kan hun ṭha a nih thu ka hrilh. A bik takin box chhungah kan hriam a ngai tih ka sawi ngun bawk, ka duh ang takin ka naute an khel chhuak.
"Ni tina training ho kan ni a, an theihna ka hriatchian em avangin hetiang zat goal kan khung hian min barakhaih lem lo, an ṭha tawk a ni tih a takin an rawn lantir ni maiah ka ngai," a ti.
Gunners hian season hmasa khan Hammers hi khualmualah 2-2 in an inhnehtawkpui. Emirates Stadium-ah ngei 2-0 in an ngam lo zui, tun season erawh boruak a danglam ta hle - nomawi an beiseina a la nun phah bawk.
Hammers an chuai
Chawlhlawk hman a nih laiin London Stadium aṭangin Hammers ṭantu tam tak an haw hum hum tawh a, an beisei ang inkhel an hmuh loh bakah an chak lo dawn tih a chian tawh vang a ni - David Moyes tan fans thinlung nan thuam dam ngei a ngai dawn.
Hammers manager Moyes chuan,"Lungngai taka khelmual chhuahsante dinhmun kha ka hrethiam, chutihrualin tun hnai kum thum chhung hi chhung ila, kan club hian a hun tawn san lai ber a tawng tih kan hriat a ngai ve bawk, chhe ta duai kan ni bik lo," a ti.
West Ham hian Premier League bikah chuan anmahni khelmuala an tlawm chian ber ṭum an tawng a, inelna hrang hrang chhut pawhin kum 1963-64 daih tawha Blackburn 8-2 a an hneh loh nen an chak loh nasat ber ṭum a ni bawk.