UCL beisei ngam Man United

Manchester United chuan season tharah Champions League khelh phak ngei an tum tih February 11, Pathianni zan khan an lantir a, Villa Park-ah mual neitu Aston Villa chu 2-1 in an hneh.

Erik Ten Hag-a hoten Rasmus Hojlund hmangin goal khung hmasa mah se 1-0 a nih hnuah Aston Villa an chungnung a, goalkeeper Andre Onana a che ṭha takzet. Mahse, Onana tan pawh dan sen a ni lo a, Douglas Luiz-a'n Villa tan si phurh a sut. Mualneituin chak an tum a, mah se minute 86-naah Scott McTominay-a'n mikhual team tan chakna goal a tauh lut.

Man United hi parukanaah awm chhunzawm mah se Champions League khel tur zawnnaa an elpui Villa an hneh miau avangin Unai Emery hote nena an inkar chu point nga chauh a ni tawh.

Hojlund, i fuh thlawt!

Man United-in December 26-a Aston Villa an mikhual hma khan Rasmus Hojlund-a'n Premier League-ah goal a la khung lo a, sawiselna ri pawh a ri ṭan. Mahse, mit khap kar lekah thil a danglam.

Villa lakah Hojlund-a'n chakna goal a khung a, hemi hnu hian league match ngaah goal nga a khung. Villa Park-ah Hojlund hian minute 17-na lekah man of the match-a thlan Harry Maguire-a ball tauh chu goal-ah a chantir. Kum 21 mi Hojlund-a'n hming a chher ṭan a, Man United ṭantute pawhin an ngaina tawh hle.

Onana Show

Man United-in goal an khung zawhah inkhelh kalhmang a danglam nghal. Aston Villa-in vawi leh khatah inkhel an thunun vek a, goal chance pawh an ngah. John McGinn leh Ollie Watkins te goal khung tur chu Andre Onana-a'n a dansak a, Watkins-a ball pet vawi hnih a danah second half-a mi a ṭha lehzual.

Ten Hag-a'n Afcon khel tura Onana chelh khawtlai chhan chu a hriat ta a, David de Gea a chhuahtir chhan pawh a hmuh theih bawk. Mahse, Onana pawhin a veng seng lo. Douglas Luiz-a'n minute 67-naah si phurh a sut a, 1-1 a ni.

Villa-in chak tumin na takin an nawr zui zel a, Man United an ṭang hram hram. Inkhelh dan thlirin Ten Hag-a hote tan point khat hlawhchhuah chu resul ṭha tak a ni.

A tawpah McTominay

Man United-in goal an chhuah belh loh nan goal venhim hna an thawk a, chutihrualin Alejandro Garnacho chu a tlan chakna hmangin Villa tlarhnung ven karah a tal put leh ṭhin. Mahse, kum 19 mi Garnacho finishing a la ṭha tawk lo.

Minute 86-naah dinglam aṭanga Diogo Dalot-a cross chu Scott McTominay-a'n tauh lut a, 2-1 a ni. Hun pek belh a tam avangin United tan goal venhim hna hi a la hautak a, Ten Hag-a'n an dinhmun hrechiangin Sofyan Amrabat leh Jonny Evans te goal venghim turin a luhtir a, goal an chhuah belh tawh lo.

Man United hian February 18, Pathianni hian Luton Town an tlawh dawn a; March 3, Pathiannia Eithad Stadium an tlawh hmain Fulham an mikhual leh ang. Ten Hag-a hote hi an chak zawn thei a nih chuan Manchester Derby en a châkawm sawt ang.