Super Bowl LVIII-ah Kanan City Chiefs

America ramma an inelna ngaihhlut American football-a a hmawr bawkna Super Bowl LVIII-ah Kanan City Chiefs chuan an khingpui San Francisco 49ers chu overtime-ah 25-22 in an hneh.

Nimin zing khan Allegiant Stadium, Nevada-ah Super Bowl hi khelh a ni a, overtime vawi hnih awmna chauh a ni. Kum sarih liam ta khan Super Bowl LI-ah overtime hi khelh a ni tawh a, hei hian Chiefs leh 49ers te an intluktawk tih a pholang.

Chiefs quaterback Patrick Mahomes chu a vawi thum nan Super Bowl MVP-ah thlan a ni a, kum 28 mi hi NFL quaterback ṭha bera chhaltu pawh an awm nghal der tawh. Mahomes hi NFL MVP-ah vawi hnih thlan a ni tawh a, 1st Team All Pro-ah vawi hnih a tel tawh a; AFC Championship games a zawnin vawi ruk khel.

Super Bowl-ah vawi thum a chak tawh a, MVP-a thlan a ni vek tawh a; a contract hlut zawng hi dollar maktaduai 500 a ni. American football-ah Tom Brady hun a zo a, Mahomes-a hunin a chhunzawm tiin a sawi theih. Inkhelh banah Mahomes chuan, "Pathian ropui ber rawh se," tiin a sawi.

Super Bowl hi halftime show vanga ngaihven ṭhahnem tak an awm a, tun ṭumah hian R&B leh pop singer Usher a rawn inlan. Chutihrualin ngaihven hlawh bera chhal ngam erawh Chiefs tight end Travis Kelce a ni a, ani hi Taylor Swift nen an inkawp mek. Zaithiam lar bik Taylor Swift pawhin Chiefs champion hi a nuam a ti hle.