
Barca leh Atletico an chak zo lo

Real Madrid-in nuamsaa an elpui Girona an hneh hnuah Barcelona leh Atletico Madrid an inlan a, an chak zo ve lo - Barcelona hian an mikhual Granada chu 3-3 in an inhnehtawkpui a, an tan champion nomawi humhim a hla zel.
Barca tan Lamine Yamal chuan goal hnih khungin, Robert Lewandowksi chuan goal khat a khung bawk a, mahse, mikhual team tan Ricard Sanchez, Facundo Pellistri leh Ignasi Miquel ten goal an khung ve avangin Barca an chak zo lo.
Hetihlai hian Atletico Madrid pawhin khualmualah hnehna an chang zo lo a, Sevilla chu 1-0 in an ngam lo - Isaac Romero chuan mualneitu tan goal awmchhun a khung a, chhanletna tur an neih loh avangin kut ruakin Atletico an haw.
Atletico Madrid tan champion sawi rik ngamna chi a ni ta lo a, nizan inkhelah Athletic Bilbao an chak chuan table-a pangana Bilbao nen hian an point hmuh zat a inang dawn - season thara Champions League khelh phak tum pawh a hautak chho dawn.
A thlawn mai maw
Barca tan rawlthar duhawm Yamal a langsar a, kum 16 mi winger hian minute 14-naah goal hmahruai a khung. Mahse, Barca-in goal dang an khung zui lawk lo a, Ricard Sanchez chuan minute 43-naah si phurh sutin, 1-1 in chawlhlawk an hmang.
Second half-ah phei chuan Granada hi vawi hnih ngawt hmahruaitu zawkah an ṭang a, Manchester United aṭanga loan-a an hawh Pellistri chuan minute 60-naah an hmahruai hmasakna zawk goal a khung - minute thum hnuah Lewy hmangin Barca hian an sut.
Mahse, Miquel hmangin Granada hian hma an hruai nawn a, a tawpa Barca chhanhimtu chu Yamal niin, minute 80-naah si phurh sutna goal a khung - relegate thei dinhmuna ding Granada-in Barca lakah point an hlawh chhuak a, Catalan club tan inenfiahna tur a awm nual.
Barca tan nomawi beisei ngam harsa tawh mah se coach Xavi erawh a beidawng ve lo a, Spanish coach chuan, "Madrid nen kan inkar a zau ta viau a, pahnihna Girona pawh point ngain kan thlau ta. Mahse, kan la beidawng mai dawn lo," a ti a, league title an la beisei tlat thu a sawi.
Atletico an tlawm
Tun season-ah Sevilla an talbuai a, coach pawh vawi thum ngawt an thlak tawh. Atletico an hmachhawn hmaa an league match hnuhnung parukah vawi khat chiah an chak a, season danga European football khelh tum ṭhin hian tlak loh hram dan ngaihtuahin season an hmang mek.
Mahse, Sevilla hian Atletico lakah theihna an nei tih an lo pholang a, minute 15-naa Romero-a goal khung hmangin 1-0 in an hneh - Atletico tlarhnung tihsual tiin a sawi theih a, Diego Simeone naute khualmualah an tlawm.
Simeone chuan, "Ka naute khelh danah ka lawm a, second half kha kan khel ṭha takzet. Chance kan nei chungin goal-ah kan chantir thei lo a, dawhthei taka kan thawhrim zel a ngai a ni," a ti a, a naute a sawisel duh lo.
Atletico keeper chhuanvawr Jan Oblak chuan, "Khualmualah kan tlawm hnem ta hle a, league nomawi beisei tan chuan a chi loh. Lang tlang taka thil sawi a ṭha a, champion kan la hlat a ni," a ti a, a lawm lo hle.