Napoli hnehtu Milan

AC Milan chuan Juventus leh Inter Milan te an thlahfal lutuk duh bik lo. Pathanni zan khan Milan hian Theo Hernandez-a goal khat hmangin Napoli 1-0 in an hneh - Serie A champion tur a la chiang bik lo.

Stefano Pioli-a naute hian Serie A match 24 aṭangin point 52 an hmu a, pahnihna Old Lady an phak lohna chu point khat chauh a ni - hmahruaitu Inter Milan chuan point 60 an nei tawh thung, match khelh hmabak a la tam avangin thil a la danglam thei.

Milan hian Napoli hi an hneh khat angreng, league match bikah phei chuan San Siro-ah pawh kum 2014 hnu lamah an la hneh leh miah lo! Italian Cup leh Champions League-ah erawh an hneh thung, tunah chuan league lama an record chhe tak pawh an thai bo.

Milan manager Stefano Pioli chuan,"Tun hnai thla khat leh a chanve chhung chu kan khel ṭha thei hle. Hmahruaitu Inter nena khaikhin chi chu kan ni rih lo mai thei, chutihrualin tunlai kan boruak bikah chuan anni ai pawhin kan hniam bik lo," tiin a naute a chhuang hle.

Napoli erawhin season an hmang fuh lo chhunzawm. Naples club hian match 23 aṭangin point 35 chauh an la hmu a, an tan Serie A nomawi humhim beisei ngam chi a ni tawh lo. Champions League khel phak china awm tal erawh an tum ang.