Barcelona: Coach thar Koeman, Messi a cham dawn?

Champions League aṭanga an tlak hnuah Barcelona-in chanchin thar an neih belh zel a, club president Josep Maria Bartomeu-a'n coach atan Ronald Koeman an lakluh thu a sawi hnuah club chuan official-in Dutch coach an lakluh thu hi an puang. 

Koeman hian Barcelona enkawl turin June 30, 2022 thleng contract a ziak a, season hnih chhung chu a enkawl dawn tihna a ni. Barcelona chuan an coach thar hi, "I inah kan lo lawm a che," tiin social media lamah lawmna thu an pholang. 

Hetihlai hian Bartomeu chuan chhuak tur anga sawi Lionel Messi chhuah loh tur thu a sawi bawk a, Catalan club ṭantute tan chuan thawk huaina tham a tling. Bartomeu chuan, "Messi hian Barca-a a career hman zawh a duh a, chu chu vawi tam a sawi tawh a ni," a ti. 

Barcelona hian Bayern Munich laka an mualpho hnuah coach Quique Setien chu a hna aṭangin an chawlhtir a, Koeman an lalut. Club sporting director Eric Abidal chu Thawhlehni zan khan an ban bawk a, Abidal-a thachhang dawltu ni ṭhin Ramon Planes chu technical director thar a nih thu an puang.

Tun hnaia Barcelona beisei phak loh dana player lungawi lo langsar ber chu Messi a ni a, Inter Milan hming lam rik a nih ve reng bawk avangin Argentine forward hi Serie A lamah a kal mai a rinawm hle. 

Mahse, Bartomeu chuan, "Koeman nen kan titi a, kan ruahmanna zawng zawngah Messi hi kan behchhan a ni. Kum 2021 thleng contract a la nei a, amah nen pawh kan titi fo. A bik takin a pa nen kan inbe nasa a ni," a ti a, Messi nen an inkar ṭhat thu a sawi. 

Barca President chuan sawi zawmin, "Khawvela football thiam ber a ni a, Koeman-a ruahmannaah Messsi hi a tel ngei ngei ring rawh u," a ti a, Messi a chhuak dawn lo. 

Messi hi tun season-ah nomawi an chawi loh avangin sawi hnawmna awm deuh mah se inelna hrang hranga match 44-a khelhah goal 31-a khung a, assist vawi 26-a nei - European top striker tam tak

season ṭhat vanglai tak ang a la ni. 

Barcelona-a hma hun chiang lo ber pawl chu Philippe Coutinho a ni a, Liverpool aṭanga pound maktaduai 142-a an lei midfielder hian Bayern Munich-ah loan-in hun a hmang mek. 

Coutinho hi Bayern-ah pawh Hans-Dieter Flick-a'n coach hna a chelh hnuah a tla tlum lo a, a club Barca laka goal hnih a khung bakah assist vawi khat a neih avangin a thiam a la theihnghilh lo tih erawh a chiang. 

Arsenal nena sawizawm mek midfielder hi Koeman-a player duh ṭhin a ni a, Dutch coach hian Barca-in Liverpool aṭanga an lei khan Coutinho fakna thu a lo sawi tawh - Nou Camp-ah a chelh a nih pawhin a mak lo ang. 

Bartomeu chuan, "Coutinho chungchangah chuan Koeman-a'n thutlukna a siam ang, club-a cham chhunzawm tura a duh a nih chuan season tharah kan hnenah a khel leh ang," a ti - Coutinho hian tun season-ah match 36 khelin goal 11 a khung a, assist vawi kua a nei tawh.

Barcelona squad a insiksawi nasa dawn niin khawthlang media ten an tarlang nasa a, he thu hi Bartomeu chuan a dik ngei thu a sawi. Barca President chuan, "Intuai thar kan mamawh takzet. 

"Kan squad kawl mek hi kum khat dang hun pek a hmain ka lo remti tawh a, nikumah khan bul ṭan tawh tur zawk kan lo ni reng a ni mai thei a ni. Pawisa chu a awm ngei a, mahse Covid-19 vangin kan sum lakluh erawh a tlem phah. 

"Hei vang hian player thar lalut tur chuan player hlawha kan sum sen dan thleng hian tihdanglam a ngai dawn a ni," a ti a, Bartomeu hian player hlawh hnem, kum upa ho chhuahtir a tum tihna a ni. 

Barca hian an sum lakluh 70% chu first team player hlawhah an seng. Bartomeu chuan, "Ka tana awlsam ber chu banna thehluh a ni a, mahse heng zawng zawng chinfel hi ka hna a nih avangin ka bang duh lo. Club kan buai hluai a ni lo a, khelmual chhung buaina chauh a ni - chu chu kan siamṭha ang," a ti. 

Barcelona-in Setien an ban tawh a, porting director Eric Abidal an ban leh a, player lam an hawi ṭan ang - Bartomeu ngeiin an insiksawi tur thu a sawi avangin Koeman-a duh dana khel thei tur player an zawng ang. 

Bartomeu chuan, "Lionel Messi, Marc-Andre ter Stegen, Clement Lenglet, Nelson Semedo, Frenkie De Jong, Antoine Griezmann leh Ousmane Dembele-te hi chu khawih thiang lo an ni," a ti a, a bak zawngah chuan Koeman-a'n a duh duh a hralh thei dawn tihna a ni. 

Barca President-in hming a lamchhuah zingah Gerard Pique, Luis Suarez, Jordi Alba, Sergio Busquets, Ivan Rakitic, Arturo Vidal leh Samuel Umtiti te an tel lo a, an chhuak thei dawn tihna a ni - a bik takin Pique, Suarez leh Busquets te hian club tana an hnathawh an thlirkir ang a, 'na' an ti ve khawp ang. 

Thilmak tak pakhat a la awm cheu - chhuak tur anga sawi thawm awm Semedo leh Dembele te Bartomeu-a'n khawih thiang lo zinga a dah hi a ni a, Bayern laka mualpho fal zinga mi Semedo leh inhliam ngun ve tak Dembele chelh an duh hi 'a mak' tih mai loh chuan hrilhfiah a harsa.

Barcelona player khawih thiang lo zingah Luis Suarez a lang phak lo a, Uruguayan striker hi kum 33 ni tawh mah se tun season-a Barca chet chhiat chhana puh zinga tel atan chuan a la uiawm mah mah. 

Suarez hian tun season-ah Barca tan inelna hrang hrangah match 36 khelin goal 21 a khung a, assist vawi 12 a nei - goal 33-ah a la inrawlh cheu tihna a ni. European club zingah awt tu tam tak an la awm ang. 

Uruguayan forward hian Nou Camp-a season ruk hun a hman chhungin Barca tana goal khung hnem pathumna dinhmun a hauh hman a, goal 198-a khung - assist vawi 109-a nei bawk a, Barca tan match 283-ah goal 307-ah a inrawlh tihna a ni. A namai lo hle. 

Suarez hi Europe-a a hming a chherna Ajax chuan lakluh an duh niin sawi thawm a awm a, match 159-a goal 111-a khungsak team-ah hian a kir a nih pawhin a mak lo ang - Liverpool hming pawh sawi rik a ni.