Jamshedpur leh Bengaluru inhnehtawk
Pathianni zan Indian Super League inkhelah Jamshedpur chuan 1-1 in Bengaluru an inhnehtawkpui a, Khalid Jamil-a enkawlna hnuaiah JFC-in ISL-ah tlawm an nei lo tluang zel. Mahse, chance ngah zawk an nih avangin Bengaluru laka an result-ah an lawm a kim lo ang.
Bengaluru hian minute 14-naah Suresh Singh-a hmangin goal hmahruai an khung a, mahse, Men of Steel hian bench aṭanga luhtir Javier Siverio hmangin si phurh an sut - hun tawp thlengin goal dang a lut zui lo a, team pahnihin point an insem.
Jamshedpur boss Khalid Jamil chuan, "Kan zavaiin kan khel ṭha a, point thum hmuh kan duh hle a, hmuh pawh kan phu," a ti a, Aizawl FC boss hlui chuan sawi zawmin, "First half-ah theihtawp kan chhuah a, chance pawh kan nei. Mahse, kan finishing a la ṭha tawk lo a ni.
"Second half-ah player kan thlak nual a, chu chuan danglamna a thlen ta a ni," a ti a, point thum an hlawh chhuak zo lo chu a ui hle. Jamshedpur tan hian PC Laldinpuia chuan minute 90 a khel tluan a, Bengaluru tan midfielder Lalremtluanga Fanai chu bench aṭangin a lut thung.