Tu nge Koeman?

Kum 57 mi Koeman hian player a nih laiin Barcelona tan season ruk a khel hman a, defender nichungin match 264-a inlansakah goal 88 ngawt a khungsak thei a ni. Catalan club tan hian La Liga (4), Copa del Rey (1), Spanish Super Cup (3), European Cup (1) leh European Super Cup (1)-ah te a champion hman.

Barcelona-in European Cup, tun hnua Champions League hming vuah tak nomawi an chawi hmasak ber chu 1991-92 season kha a ni a, Wembley Stadium, London-a final-ah Sampdoria chu 1-0 in an hneh - Koeman chuan extra time-ah he inkhela goal awmchhun hi a khung. Barcelona-in an 'hero' an lawm let ti pawhin a sawi theih. 

Defender goal khung thei tak a nihna chu a larpui a ni a, Champions League 1993-94 season-ah khan Barcelona tan goal riat khungin Werder Bremen striker Wynton Rufer nen top scorer an ni!

Netherlands tan pawha vawi 78 inlan thei coach hian kum 1997-ah inkhelh chawlhsanin a coaching career a ṭan a, an ram team-ah hian season khat chhung assistant coach hna a chelh. 

Kum 1998 khan Barcelona-ah assistant coach-in a lut a, 1998-99 season chhungin B team enkawl tir a ni a, kum 2000 thleng a cham. Kum 2000-ah hian a vawi khat nan coach puitling niin Vitesse a enkawl a, Dutch team hi budget nei tlem tak chungin UEFA Cup  khel turin a tlinpui thei a, hemi hnu hian Portugal, Spain leh England-ah te club enkawl hna thawkin Barca manager a nih hma hian an ram Netherlands a enkawl a ni.