NBA Playoff Game 1-ah Lebron-a'n Lillard a ngam lo

Basketball inelna ngaihhlut NBA-ah team ṭha bik chauh telna Playoff an khel ṭan ta a, inkhel a hmuhnawm bakah result a ngaihnawm tel.

Regular season-a che ṭha ber Milwaukee Bucks an chak loh hnuah Western Conference-a pakhatna Los Angeles Lakers-in game 1-ah Portland Trail Blazers  93-100 in an hneh lo.

Nimin zinga Advent Health Arena, Florida-a inkhelah Trail Blazers guard Damian Lillard a che ṭha fal a, point 34 zet neiin LeBron James leh Anthony Davis telna Lakers an barakhaih.

Regular season-a an dinhmun thlir chuan LA Lakers leh Trail Blazers hi an intiat tawk lo, LeBron James-a hote hi vawi 52 zet an chak laiin Damian Lillard-a hote erawh vawi 35 chiah an chak.

Regular season-a team pahnih inkhelhna bikah Lakers hi vawi hnih an chak a, Trail Blazers hi vawi hnih an chak. Lakers chak ṭum hi nikum a ni a, Trail Blazers chak ṭum hi kumin a ni thung. Playoff game 1-ah Trail Blazers an chak takah chuan tun season bika vawi li an inkhelhnaah 2-2 a ni chiah a, Lakers hawi sang thei an ni ta lo.

Trail Blazers-in hnehna an chang dawn a nih chuan Damian Lillard a pawimawh. NBA All Star-a vawi nga zet tel tawh Lillard hian kumin January-a Lakers an hneh ṭumin point 48 zet a nei a, playoff-ah pawh a langsar leh hle.

Lillard hian point 34 a nei a, minute thum chauh a awm tawha feet 35 aṭanga 'long three' a luh chu an chak theihna chhan a ni. Inkhelh banah Blazers guard chuan, "A tawp thlengin theihtawp kan chhuah a, offense leh defence-ah kan thawkrim. Chutihrualin vawi khat chauh kan la chak a, hnehna chang tur chuan hmabak a la thui hle," tiin a sawi.

Trail Blazers-in bul an ṭan ṭha a, amaherawhchu LA Lakers rawn lehthalin hma an inhruai chhawk zak zak hnuah Portland an chungnung ta zawk. Lillard bakah point 21 neitu CJ McCollum leh  Jusuf Nurkic hming lam hmaih a thiang lo. Nurkick hian double-double neiin 16 pts leh 15 rebounds a nei a; Hassan Whiteside pawhin vawi nga block a nei a, team angin Portland an khel ṭha hle.

LA Lakers-in LeBron James bakah Anthony Davis leh Kyle Kuzma te an nei a, tun hnaiah phei chuan Davis hi James aiin a che ṭha zawk. Lakers hi awlsam taka semifinal lut tura ngaih an ni a, amaherawhchu a awlsam dawn ta lo.

Lakers hi vanduai thei an ni tih a lang a, chutihrualin game 1-a an chak loh avangin dem viau theih an ni lo. James hian point 23 a nei a, vawi 16 zet assist a nei. "Ka hmaah Isua ding se, ka lut tho ang," ti tu Kuzma pawhin point 14 a nei a, a in ṭawng chhiat ve thei bawk.